UTAPENDA, SHEREHE ZA MWAKA MPYA WA KIISLAMU - BUMBWINI

Mjumbe wa Baraza la Maulamaa, Ofisi ya Mufti Zanzibar, Sheikh Abdallah Haidar Abdullah, amewasihi wananchi wa Bumbwini kuendelea kuwa wamoja, kushikamana katika ibada na kumcha Mwenyezi Mungu kwa kuzingatia maamrisho na kujiepusha na makatazo yake ili kupata radhi na rehema zake. Sheikh Abdallah ametoa wito huo katika kongamano la kuadhimisha Mwaka Mpya wa Kiislamu lililofanyika katika Skuli ya Bumbwini, Mkoa wa Kaskazini Unguja. Amesema vijana wanapaswa kuwa tayari kuyatekeleza mafundisho ya dini ya Kiislamu na kuishi kwa mujibu wa maadili mema, akieleza kuwa kufanya hivyo kutawasaidia kupata mafanikio duniani na Akhera. Aidha, amevitaka vyombo vya ulinzi na usalama pamoja na askari jamii kuendelea kuimarisha doria ili kudhibiti vitendo vya uhalifu vinavyohusishwa na matumizi ya dawa za kulevya na kulinda amani katika jamii. Kwa upande wake, Mkuu wa Dawati la Jinsia, Ndg. Machano Khamis, amesema dawati hilo lipo kwa ajili ya kulinda haki za wanawake, wanaume na watoto, huku akiitaka jamii kutoa taarifa kwa mamlaka husika mara tu vitendo vya ukatili au udhalilishaji vinapotokea. Nao waandaaji wa kongamano hilo, walimu wa vyuo vya madrasa, wamesema lengo la maadhimisho hayo ni kuhamasisha jamii kuthamini Mwaka Mpya wa Kiislamu, kuimarisha maadili ya dini na kuunga mkono juhudi za Serikali katika kudumisha amani, umoja na mshikamano nchini. #Zanzibar #MwakaMpyaWaKiislamu #Bumbwini #MuftiZanzibar #Amani #Maadili #AsamOnlineTV #TrendingNow