MARIDHIANO YA CCM NA ACT YATAJWA KUWA CHACHU YA UMOJA NA MAENDELEO ZANZIBAR

Mwenyekiti wa Chama cha Wakulima (AAFP), Said Soud Said, amesema Zanzibar imepiga hatua kubwa katika kuimarisha maridhiano kati ya CCM na ACT Wazalendo, akieleza kuwa hatua hiyo inaonesha dhamira ya viongozi wa vyama hivyo katika kuendeleza amani, umoja na maendeleo ya Zanzibar na Tanzania kwa ujumla. Akizungumza na waandishi wa habari katika Ofisi Ndogo ya AAFP, Mwera, Wilaya ya Magharibi "A", Mkoa wa Mjini Magharibi, Said amesema lengo kuu la maridhiano hayo ni kuhakikisha nchi inaendelea kuwa na amani, utulivu na mazingira wezeshi yatakayochochea maendeleo ya wananchi pamoja na ustawi wa taifa. Ameeleza kuwa amani ndiyo msingi wa maendeleo katika sekta mbalimbali, hivyo kuna umuhimu kwa wananchi kuendelea kuilinda na kuunga mkono juhudi zinazolenga kuimarisha mshikamano wa kitaifa. Aidha, amempongeza Dkt. Hussein Ali Mwinyi na Mhe. Othman Masoud Othman kwa hatua ya kufanikisha maridhiano hayo, akisema yameonesha uzalendo na dhamira ya dhati ya kuweka mbele maslahi ya Zanzibar na wananchi wake. Said ametoa wito kwa wananchi kuendelea kuwaunga mkono viongozi hao kwa kudumisha amani, umoja na mshikamano, akieleza kuwa hali hiyo itasaidia kuharakisha maendeleo ya kijamii na kiuchumi pamoja na kuijenga Zanzibar yenye ustawi na mafanikio kwa vizazi vya sasa na vijavyo.