LESONA 2 Q3 2026 NY HAFATRY NY HAZO FIJALIANA DR BENOIT RAKOTOVAO

NY HAFATRY NY HAZO FIJALIANA Vakiteny hianarana amin'ity herinandro ity 1 Kor. 1:17–31, Kol. 1:20, 1 Pet. 2:24, Asa 13:16–47, 1 Kor. 2:1–5. Tsianjery: “Fa ny teny ny amin’ny hazofijaliana dia fahadalana amin’izay ho very, fa herin’Andriamanitra kosa amintsika izay hovonjena” (1 Korintiana 1:18). Cicero, mpanoratra sady mpandravaka teny romanina jentilisa, dia nilaza tamin’ny vahoaka romanina mba tsy hisaina akory ny amin’ny hazofijaliana, satria tena nahatsiravina loatra izany fomba fahafatesana izany. Na dia maty antsasaka taonjato teo ho eo nialohan'ny nahaterahan'i Jesosy aza i Cicero, ny teniny dia mampiseho ny tsinontsinona sy ny fanesoana nentin’ny Romanina nanamavoana ny hazofijaliana. Tena ratsy loatra izany ka tsy tokony hoeritreretina akory. Etsy an-daniny kosa, nanoratra i Paoly hoe: “Ny teny ny amin’ny hazofijaliana... dia herin’Andriamanitra” (1 Kor. 1:18). Ho an’i Paoly, ny Hazofijaliana no fitaovana nampihavanana an’Andriamanitra sy ny olombelona (Ef. 2:16, Kol. 1:20), sary famantarana farany ambony indrindra amin’ny fanetren-tenan’i Jesosy (Fil. 2:8), ary ny toerana nandoavana ny tondro-molotra na ny tondro-bola mavesatra nianjady tamintsika (Kol. 2:14). Ny Hazofijaliana no navalin’i Paoly manoloana ny olana tao Korinto. Tsy mila mandeha lavitra ianao ao amin’ny 1 Korintiana vao mahatsapa fa manahy mafy izy ny amin’ny olana lehibe iray: ny fisarahana sy ny fisaratsarahana ao am-piangonana. Tena sahirana saina mafy i Paoly ka raha vao tapitra ny fiarahabana (1 Kor. 1:1–3) sy ny fizarana fisaorana (1 Kor. 1:4–9), dia ity avy hatrany no lohahevitra voalohany noraisiny (1 Kor. 1:10–17). Amin’ity herinandro ity, hifantoka amin’ny hafatry ny Hazofijaliana izay feno hery isika, ho valin’izany olana izany sy ireo olana hafa tao Korinto.