WAZAZI WAONYWA KUONGEZA ULINZI WA WATOTO BAADA YA VIFO VYA WATOTO WATATU KWA KUZAMA

Wazazi na walezi Zanzibar wametakiwa kuongeza uangalizi kwa watoto wao na kuhakikisha hawafiki katika maeneo hatarishi bila usimamizi, kufuatia vifo vya watoto watatu wenye umri wa miaka 12, 13 na 15 waliofariki kwa kuzama katika bwawa lililopo Mbuzini, Wilaya ya Magharibi "A", Julai 13 mwaka huu. Akizungumza wakati wa kuwafariji familia zilizopoteza watoto hao huko Mbuzini, Waziri wa Maendeleo ya Jamii, Jinsia, Wazee na Watoto Zanzibar, Mhe. Anna Athnas Paul, amesema tukio hilo ni pigo kubwa kwa jamii na limetoa funzo la umuhimu wa wazazi na walezi kuwa karibu na watoto wao wakati wote ili kuwakinga na ajali pamoja na changamoto nyingine zinazoweza kuhatarisha maisha yao. Kwa upande wake, Mkurugenzi Mtendaji wa Kamisheni ya Kukabiliana na Maafa Zanzibar, Makame Khatib Makame, amesema kamisheni hiyo itaendelea kutoa elimu mashuleni na katika jamii kuhusu mbinu za kujikinga na majanga, ikiwemo hatari ya kuzama, ili kupunguza matukio ya aina hiyo. Naye Mkuu wa Wilaya ya Magharibi "A", Lailah Burhan Ngozi, amewataka wananchi kuacha uchimbaji holela wa mchanga unaosababisha kuwepo kwa mabwawa makubwa yanayohatarisha usalama wa watoto na wananchi kwa ujumla. Viongozi hao wamewataka wananchi kushirikiana kuondoa mazingira hatarishi, kuongeza ulinzi wa watoto na kuchukua tahadhari ili kuzuia matukio kama hayo yasijirudie.