TUKIO LA KUSIKITISHA: KIJANA AKUTWA AMEFARIKI MAGOGONI

Sikitiko na simanzi vimetanda katika eneo la Magogoni kufuatia kifo cha kijana mmoja aliyejulikana kwa jina la Steven Lazaro, mwenye umri wa miaka 30, aliyekutwa amefariki ndani ya chumba chake. Kwa mujibu wa taarifa za awali, mwili wa marehemu uligunduliwa majira ya saa 12 jioni baada ya majirani na ndugu kutilia shaka ukimya wake kwa muda mrefu, jambo lililowafanya kutoa taarifa kwa uongozi wa shehia. Baada ya kupokea taarifa hizo, viongozi wa shehia kwa kushirikiana na Jeshi la Polisi walifika eneo la tukio, ambapo mwili wa marehemu ulichukuliwa kwa ajili ya uchunguzi zaidi ili kubaini chanzo cha kifo hicho. Jeshi la Polisi linaendelea na uchunguzi wa tukio hilo, huku wananchi wakihimizwa kusubiri taarifa rasmi zitakazotolewa baada ya uchunguzi kukamilika.