SIMANZI BUBUBU: VIJANA WATATU WAFARIKI KWA KUZAMA KATIKA MTO MWANAMANJAA

Huzuni imetanda katika Shehia ya Bububu, Wilaya ya Magharibi "A" Unguja, kufuatia vifo vya vijana watatu wenye umri wa miaka 12, 13 na 15 waliopoteza maisha kwa kuzama katika Mto Mwanamanjaa walipokuwa wakitafuta wadudu aina ya kukuziwa. Vifo hivyo vimeziacha familia tatu katika majonzi makubwa, huku wananchi wa eneo hilo wakieleza masikitiko yao kutokana na kuwapoteza vijana waliokuwa tegemeo na nguvu kazi kwa familia zao. Akizungumza baada ya kutembelea na kutoa pole kwa wafiwa, Mkuu wa Wilaya ya Magharibi "A" Unguja, Mhe. Lailah Burhan Ngozi, ametoa salamu za rambirambi kwa familia zilizofiwa na kuwataka wazazi na walezi kuongeza uangalizi kwa watoto wao kwa kufahamu mahali walipo wakati wote, hususan wanapochelewa kurejea nyumbani. Kwa upande wao, wazazi wa marehemu hao wamesema tukio hilo limewaachia maumivu makubwa na kuwataka wazazi wengine kuwa makini zaidi katika kuwafuatilia watoto wao ili kuepusha matukio ya aina hiyo. Naye Diwani wa Wadi ya Bububu ametoa pole kwa familia zilizofiwa na kuwasihi wananchi kuwa waangalifu wanapokwenda katika maeneo ya mito, mabwawa na sehemu nyingine hatarishi, hasa kipindi ambacho watoto hupenda kutembelea maeneo hayo bila usimamizi wa watu wazima. Mwenyezi Mungu awarehemu marehemu hao, awape pepo ya milele na azipe familia zao subira na uvumilivu katika kipindi hiki kigumu. Amina. #Zanzibar #Bububu #Mwanamanjaa #Habari #UsalamaWaWatoto #AsamOnlineTV #ForYou #FYP #TikTokTanzania