TOMONDO YAHIMIZWA KUENDELEZA UTAMADUNI WA USAFI WA MAZINGIRA

Wananchi wa Shehia ya Tomondo, Wilaya ya Magharibi B Unguja, wamehimizwa kuendeleza utamaduni wa kufanya usafi wa mazingira ili kujikinga na magonjwa yanayotokana na uchafu, kulinda afya za jamii na kuhakikisha mazingira yanabaki salama. Wito huo umetolewa na Diwani wa Wadi ya Kisauni, Hassan Ali Nassor, wakati wa zoezi la usafi wa mazingira lililofanyika katika shehia hiyo. Akizungumza katika zoezi hilo, Hassan amesema usafi wa mazingira ni jukumu la kila mwananchi, akieleza kuwa ushiriki wa wananchi katika shughuli za usafi unachangia kuimarisha afya ya jamii na kuifanya Tomondo kuwa sehemu salama na yenye mazingira bora ya kuishi. Kwa upande wake, Sheha wa Shehia ya Tomondo, Mohammed Omar Said (Kidevu), amewataka wananchi kuacha tabia ya kutupa taka ovyo, hususan kwenye mitaro, akisema hali hiyo husababisha kuziba kwa njia za maji, kuongeza hatari ya mafuriko pamoja na miripuko ya magonjwa. Naye Katibu wa Baraza la Vijana wa Shehia ya Tomondo, Abal Hassan, amewahimiza vijana kushiriki kikamilifu katika shughuli za maendeleo ya jamii, ikiwemo kampeni za usafi wa mazingira, akisisitiza kuwa wao ni nguzo muhimu katika kujenga jamii yenye afya, mazingira safi na maendeleo endelevu. #Zanzibar #Tomondo #Usafi #Mazingira #Afya #Community #AsamOnlineTV #ForYou #FYP #TikTokTanzania #InstaNews #TrendingNow