የሰኔ 17 ሥንክሳር #አባ ለትጹን #ገሪማ ገረምከነ#አባ ጰላሞን #ቅዱሳን ጻድቃን#እንኳን ሰው እፅዋት የታዘዙለት አባት

የሰኔ 17 የቅዱሳን ሥንክሳር ​በስመ አብ ወወልድ ወመንፈስ ቅዱስ አሐዱ አምላክ አሜን! ሰኔ ዐሥራ ሰባት በዚች ቀን የሚታሰቡ የቅዱሳን ገድልና ክብር፦ ​፩. ታላቁ አባት አባ ለትጹን ​ከብህንሳ አገር የተነሡትና የወንጌልን ቃል ሰምተው በጾምና በጸሎት የተጋደሉ ታላቅ አባት ናቸው። ​የፍቅር መሥዋዕትነት፦ በአንዲት ዕለት አንድ አበ ምኔት በክፉ አሟሟት ሲሞትና ነፍሱ በአጋንንት ስትሠቃይ አይተው፣ ስለዚያ ኃጥእ ሰው ነፍስ ሲሉ አምስት ጊዜ እስኪሞቱ ድረስ ሰውነታቸውን አሠቃዩ፤ በመጨረሻም ራሳቸውን በባሕር አስጥመው ሞቱ። ​መለኮታዊ ቃል ኪዳን፦ ጌታችን ኢየሱስ ክርስቶስ ከባሕር አስነሥቶአቸው፣ ስለ ፍቅራቸው ሲል የዚያችን ኃጥእ ነፍስ ሥቃይ አቀለለላት። ለአባ ለትጹንም መታሰቢያቸውን ለሚያደርግ፣ ለሚመጸውትና ገድላቸውን ለሚጽፍ ሁሉ ኃጢአታቸውን ይቅር እንደሚልና ስማቸውን በሕይወት መጽሐፍ እንደሚጽፍ ታላቅ ቃል ኪዳን ሰጣቸው። ​፪. መጻተኛው ባሕታዊ አባ ጰላሞን ​በተራራ ላይ በታላቅ ተጋድሎና ልቅሶ የሚኖሩ ፍጹም መናኒ ነበሩ። ሰይጣን በመንገድ አሳስቶ በዝሙት ሐሳብ ሊጥላቸው ቢሞክርም፣ እግዚአብሔር ግን አልተዋቸውም። በድምፅ አዝዞአቸው ወደ አባ ለትጹን ሔዱ፤ ሁለቱ ቅዱሳን አብረው ለሦስት ቀናት ከጸለዩ በኋላ፣ እግዚአብሔር ኃጢአታቸውን በሰይጣን ላይ እንዳደረገውና ይቅር እንዳላቸው የምሥራች ተነገራቸው። ​፫. የሮም ንጉሥ የነበሩት ብፁዕ አባ ገሪማ (ይስሐቅ ዘመደራ) ​የሮም ንጉሥ የነበሩ ቢሆንም፣ የአባ ጰንጠሌዎንን ጥሪ ሰምተው መንግሥታቸውን ትተው በሌሊት ወጡ። ​ተአምራዊ ጉዞ፦ ሊቀ መላእክት ቅዱስ ገብርኤል በብርሃን ክንፎቹ ተሸክሞ የ፲ (10) ወር መንገድ በ፫ (3) ሰዓት አድርሶ ኢትዮጵያ አገባቸው። ​ድንቅ ተአምራት፦ በመደራ አገር በጥዋት የዘሩትን በሠርክ ሰብስበው መሥዋዕት አደረጉ፤ የወይን አረግ በአለት ላይ ተክለው ወዲያው አፈራች፤ ሲጽፉ መሽቶ ፀሐይን በቦታው እንዲቆም አዘዙት። አባ ጰንጠሌዎስም በተጋድሎአቸው ተደንቀው "ገረምከኝ" ስሏቸው "አባ ገሪማ" ተባሉ። ​ቃል ኪዳን፦ ጌታችን ተገልጦ መታሰቢያቸውን ለሚያደርግ እስከ ፲፪ (12) ትውልድ እንደሚምር ቃል ኪዳን ሰጣቸው፤ ከዚያም በብርሃን ሠረገላ ተነጥቀው ብሔረ ሕያዋን ገቡ። ​፬. በዚች ቀን የሚሰቡ ሌሎች ቅዱሳን፦ ​የሰማዕታት የነአኮራን፣ የበርተሎሜዎስ፣ የእለስክንድርያ፣ የእለስክንድሮስ፣ የዮሴፍና የጻድቂቱ አርሴማ መታሰቢያ ነው። ​📖 የዕለቱ መዝሙር፦ "የጻድቅ አፉ ጥበብን ይማራል ፥ አንደበቱም ጽድቅን ይናገራል ። የአምላኩ ሕግ በልቡ ውስጥ ነው ፥ ሰኰናውም አይሰናከልም ።" (መዝ. 36÷30-31) ​የቅዱሳን አባቶቻችንና የእናቶቻችን ጸሎትና በረከት ከሁላችን ጋር ይሁን፣ ለዘላለሙ አሜን! ‪@yekidusantarik‬ ‪@EOTCOrthodoxChannel1‬ ‪@swromariyamgedam‬