PASIAN’ KHUTMA

LAITHAINI JULY 17 JOB 38:31-41 Van a om nate’ zuih ding ngeina bawlsak thei na hiam? [JOB 38:33] PASIAN’ KHUTMA ဘုရားသခင်၏ လက်ရာတော် GOD’S HANDIWORK Tuithe-te pen len dan a lamdang leh thuakzawhna a nei ganhingno namkhat hi. Huih lakah nuamtak a gamtat theihzia hoihtak kikanin tua panin vanleng bawlna ah ki-etteh hi. A khazap pen secod khatin 30 vei ahihlam, a tung pan kiasukvat ahihleh second 0.2 (second zasehsuah nih) tangkik thei ahihlam, nungdeuhin mipilte in mukhia hi. A mitte-un second khat simin limlemel 200 muthei ahih manun a len nading lampi a nensi-in khensat thei uh hi. Pasian’ pilna leh geeltawm siamna pen hih pianngeizia i leitung mun citengah kimu thei hi. Job sungah Job in a langkhatah ama’ thuakna, a langkhatah Pasian’ hoihna leh dikna hamsapi-in leptuah sawm hi. Pasian in “Van a om nate’ zuih ding ngeina bawlsak thei a, lei a om nate’ zuih ding ngeina bawlsak thei na hi hiam?” ci hi (Job 38:33). Pasian in vasate, kelte a kipan leitunga a golpen gamsapite dong tampitak lakkhia hi. Ganhing khatta a nuntakzawh nadinga a kisamte hitaleh a note’ gilkiala a hamna hitaleh Pasian in phawk hi (38:39-41). Pasian in ganhingte a nuntak theih nading zialetong khattek pia-a gentehna-in vasa-kalaohte manlang mahmahin bawngtalte thahat mahmah uh hi. Tuithe khat ii kilamzia bang zahin lamdang hiam? I sinbeh ding tampi om hi. Himahleh piansak ganhingte a geel, na khempeuh a thei Pasian pen khuamialpen pan ama’ ompihna khuavak leh lungdamna sungah eite hong tunpihzia ding a thei Pa mah ahi hi. KAREN PIMPO Hih leitung na kiimlepaam ah Pasian’ khutma koi-ah mu na hiam? Tuate in ama’ limlemel bangci lahkhiat uh hiam? Piangsak Pasian, ka telzawhloh laitak nangawn na pilna leh na thumanna ka muang hi. KUMTAWN LAI SIANGTHO|LATE 18-19; SAWLTAK 20:17-38