KIKHIHNA KOL A PHELKHIA PASIAN

KIGINNI JULY 11 2 TIMOTHY 2:1-13 Tua ahih manin … na khempeuh ka thuak hi. [2 TIMOTHY 2:10] KIKHIHNA KOL A PHELKHIA PASIAN ဘုရားသခင်ကြောင့် အနှောင်အဖွဲ့ကင်းခြင်း UNCAINED BY GOD Bulgaria mi tuipekte a ciing Yane Petkov pen khutte leh khete khihsa-in tuipek ahih manin leitung bup ciaptehna laibu ah a min kihelzo hi. Tui sungah meter 3,380 pekzo bek hilo-in ippi khat sungah kikhumin pek lai hi. Hih banga “kikhihcip” kawmkalah a pumpi kikhinzawh nadinga Petkov ii neih lungduaina leh thahatna lamdang ka sa hi. Paul in zong tanglai pawlpi hun lai-in Pasian’ na a sepna ah a tuahkhak haksatnate tua dan mahin khauhtak nangzo hi. Gimletawlna, gilkial dangtakna, ihmut ciimlohna, vuaklesatna, cihte kawmkalah Pasian’ thu genin thu umte tungah thapiakna leh lamlahna laite gelhzo veve hi. A laikhak nunung pen Tinmothy’ kiang hi a, Rome thong sung pan thah ding hun a ngak laitak a gelh ahi hi. Kolbulh khaukhih tawh a pumpi a kihen hangin “Pasian’ thu kikhihcipzo lo hi” ci hi (2 TIMOTHY 2:9). Tua ahih manin Paul in thuman thutak Jesu Khris’ thu a midangte in za-in a up nadingun “Na khempeuh ka thuak hi” ci hi (tg.10). Pasian in Ama’ na i sepna ah i tuakkhak theih haksatna khatpeuh i thuakzawh nading hong huh hi. Pumpi tunga piang thei liamna, zawngkhalna cihte ah kidon kikepna a kisap sam hangin tuate in i thanemna sunga a cingtak dinga kibawl Pasian’ vangliatna khupkhelh zolo hi (2 CORINTH 12:9). Ei’thu a, i sepzawloh nate ei’ tungtawn mahin hong sem Pasian’ min phat ciat ni. JENNIFER BENSON SCHULDT Pasian’ nasem dingin na kiginna ah a haksanapen bang munte hiam? Na cinlahna pana hong pai na thanemna nawkzawh nading Pasian in hong bangci huhnuam hiam? Kong it Pasian, ka kiphatsakna hemkhia-in na min kong thansakzawh na’ng hong huh in. KUMTAWN LAI SIANGTHO|LATE 1-3; SAWLTAK 17:1-15