RC Kunenge Aitakia Chalinze Mafanikio Zaidi ya Mapato

Mkuu wa Mkoa wa Pwani, Mhe. Abubakar Kunenge, ameipongeza Halmashauri ya Wilaya ya Chalinze kwa kuendelea kufanya vizuri katika ukusanyaji wa mapato na kuvuka malengo iliyojiwekea. Amesema Chalinze imeendelea kuwa kinara mkoani kwa kuongeza wigo wa vyanzo vya mapato na kuwataka viongozi kuendelea kubuni vyanzo vipya vya mapato kwa ajili ya kuimarisha maendeleo. Akizungumza katika kikao maalum cha Baraza la Madiwani cha kujadili Taarifa ya CAG ya mwaka 2024/2025, Mhe. Kunenge amesema kuwa kupata hati safi ni hatua muhimu, lakini mafanikio hayo yanapaswa kuambatana na mipango yenye vipaumbele sahihi na matokeo yanayogusa maisha ya wananchi. Aidha, amewataka madiwani kuendelea kushirikiana na watendaji katika kusimamia maendeleo na kuepuka migogoro isiyo ya lazima, huku akisisitiza uwajibikaji na matumizi bora ya rasilimali za umma kwa maendeleo ya wananchi wa Chalinze.