RC Kunenge Awataka Wafugaji Kisarawe Kufuga Kisasa Kuinua Uchumi na Kukidhi Soko la Kimataifa

Mkuu wa Mkoa wa Pwani, Mhe. Abubakar Kunenge, amewataka wafugaji wa Wilaya ya Kisarawe kufuga kisasa ili kuongeza mnyororo wa thamani wa nyama na kuinua uchumi wao pamoja na kuhimili ushindani wa soko la kimataifa. Mhe. Kunenge ametoa rai hiyo leo wakati wa kikao chake na wafugaji wa Wilaya ya Kisarawe kilichofanyika katika Kata ya Mzenga. Akizungumza katika kikao hicho, amesema kuwa kutokana na ushindani wa soko la nyama duniani, ni muhimu kwa wafugaji kuhakikisha mifugo na bidhaa zake zinazingatia viwango na vigezo vinavyotakiwa kimataifa. Aidha, amesisitiza matumizi bora ya ardhi ili kuepusha migogoro kati ya wakulima na wafugaji. “Ardhi haiongezeki bali watu wanaongezeka, hivyo ni lazima tufuge kwa tija. Tunapaswa kutenga maeneo maalum ya ranchi ndogo ili kuepuka ufugaji holela unaosababisha migogoro,” amesema Mhe. Kunenge. Ameeleza kuwa Mkoa wa Pwani una jumla ya ranchi ndogo 847, huku akisisitiza umuhimu wa wafugaji kumilikishwa maeneo rasmi kwa ajili ya ufugaji huo. Aidha, amesema idadi ya mifugo inayofugwa inapaswa kuendana na ukubwa wa eneo lililotengwa ili kuongeza tija na kuzuia uharibifu wa mazingira. Mhe. Kunenge amesema dhamira ya Serikali ni kuifanya sekta ya ufugaji kuwa ya kisasa na yenye tija kwa kuondoa migogoro kati ya wakulima na wafugaji pamoja na kuongeza kipato cha wafugaji. Sambamba na hilo, amekemea baadhi ya wafugaji waliopatiwa hati za umiliki wa ranchi ndogo kwa kuuza maeneo hayo kinyume cha utaratibu, na kuwataka warejeshe maeneo hayo Serikalini. Kwa upande wao, baadhi ya wafugaji wamemuomba Mkuu wa Mkoa kuwasaidia kuchimbiwa mabwawa ya maji na kujengewa majosho kwa ajili ya mifugo yao, wakieleza kuwa kwa sasa wanalazimika kusafirisha mifugo umbali mrefu kutafuta maji. Vilevile, wameomba kupatiwa wataalamu wa kuwapa elimu ya ufugaji bora wenye tija ili waweze kuongeza uzalishaji na kipato chao.