અમેરિકામાં રહેતા 'શોખીન' ગુજરાતીની FBI દ્વારા ધરપકડ

અમેરિકામાં રહેતા એક 26 વર્ષીય ગુજરાતીની FBI દ્વારા ધરપકડ કરવામાં આવી છે. ક્રિશ પટેલ નામનો આ શખસ બોસ્ટનની નજીક આવેલા ક્વિન્સીનો રહેવાસી છે. FBIની હ્યુમન ટ્રાફિકિંગ ટાસ્ટ ફોર્સ દ્વારા જૂન 12થી જૂન 16ના રોજ હાથ ધરવામાં આવેલી કાર્યવાહીમાં 18 વર્ષથી ઓછી વય ધરાવતી છોકરીઓ સાથે મોજમજા કરવાનો ઈરાદો ધરાવતા મેસાચ્યુસેટ્સના સાત લોકોને ટ્રેપ કરવામાં આવ્યા હતા જેમાં ક્રિશ પટેલ પણ પકડાઈ ગયો હતો. આ તમામ આરોપીઓને બ્રોકટન ડિસ્ટ્રિક્ટ કોર્ટમાં હાજર કરવામાં આવ્યા હતા. લોકલ મીડિયા રિપોર્ટ્સ અનુસાર આ સાતમાંથી ક્રિશ પટેલ સહિતના છ આરોપી એક હજાર ડોલરનો દંડ ભરીને છૂટી ગયા હતા. જોકે, તેમને 18 વર્ષથી ઓછી ઉંમર ધરાવતા બાળકોથી દૂર રહેવા માટે આદેશ આપ્યો છે. ક્રિશ પટેલ સહિતના આ તમામ આરોપીઓને લેટ જૂલાઈ કે પછી ઓગસ્ટમાં થનારી કોર્ટ હિયરિંગમાં હાજર રહેવું પડશે, ક્રિશના લૉયર પેટ્રિક નૂનાને મીડિયા સાથે આ અંગે કોઈ વાત કરવાનો ઈનકાર કરી દીધો હતો.