લગ્ન કરવા અમેરિકા ગયેલી યુવતી ત્રણ મહિનામાં ડિપોર્ટ થઈ

લગ્ન કરવા માટે અમેરિકા ગયેલી એક ગુજરાતી યુવતી ત્રણ મહિના બાદ ડિપોર્ટ થઈ છે. મહેસાણા જિલ્લાના એક ગામની આ યુવતી કેનેડાવાળી લાઈનથી ઈલીગલી અમેરિકા પહોંચવાના પ્રયાસમાં હતી પરંતુ બોર્ડર પર જ તેની ધરપકડ કરી લેવાઈ હતી. IamGujaratને મળેલી માહિતી અનુસાર આ યુવતીની ઉંમર માત્ર 22 વર્ષ છે, તેને અમેરિકા પહોંચાડવા માટે એકાદ કરોડ રૂપિયામાં ડીલ થઈ હતી અને યુએસમાં પગ મૂકતા જ પૂરું પેમેન્ટ આપી દેવાનું હતું. જોકે, માર્ચ મહિનાના છેલ્લા વીકમાં તે બોર્ડર ક્રોસિંગ કરતી વખતે જ પકડાઈ ગઈ અને ત્યારથી જેલમાં હતી. તેને બોન્ડ પર છોડાવવાના ઘણા પ્રયાસ કરવામાં આવ્યા હતા પરંતુ તેમાં સફળતા નહોતી મળી અને લાંબો સમય જેલમાં રહી શકાય તેમ ના હોવાથી તેણે જાતે જ ડિપોર્ટેશનના પેપર્સ પર સાઈન કરી નાખી હતી.