NUG ဘာတွေပြင်သင့်သလဲ (ရုပ်/သံ)

ဒီလမ်းဟာ ပန်းခင်းလမ်း မဟုတ်ပါဘူး။ ပြည်သူသန်းပေါင်းများစွာရဲ့ မျက်ရည်၊ သွေး၊ ချွေး၊ ဘဝတွေနဲ့ ရင်းထားတာပါ။ အာဏာရှင်က အကြမ်းဖက် ရက်စက်မှုနဲ့ အနိုင်ယူဖို့ အရှိန်အဟုန်မြှင့် ကြိုးစားနေပါတယ်။ တချို့ တိုင်းရင်းသားလက်နက်ကိုင် အဖွဲ့တွေက သူတို့ရပ်တည်ချက်ကို အပြောတမျိုး၊ လက်တွေ့တမျိုးလုပ်ရင်း ပြည်သူဟာ ဝေဝါးနေပါပြီ။ မြန်မာ့တော်လှန်ရေးဟာ တခန်းရပ်ပြဇာတ် မဟုတ်ပါဘူး၊ မျိုးဆက်အလိုက် စဉ်ဆက်မပြတ် တော်လှန်ခဲ့ကြရတာပါ။ ခေါင်းဆောင်များအနေနဲ့ ငါတို့တစုတဖွဲ့အကျိုးစီးပွားက အရေးကြီးတယ်၊ ငါတို့တစုတဖွဲ့ လိုလားတဲ့ နယ်မြေပိုင်နက်၊ သယံဇာတဆိုတာတွေရပြီ၊ တော်လောက်ပြီ၊ တော်လှန်ရေးကို ကုလသမဂ္ဂကြီးလို တံခါးပိတ်ပြီး ‘စိုးရိမ်ပါတယ်’ ပဲ တွင်တွင်ပြောတော့မယ်လို့ စဉ်းစားနေရင် ၁၉၈၈၊ ၁၉၉၆၊ ၂၀၀၇၊ ၂၀၂၁ တုန်းက လမ်းပေါ်ထွက်ခဲ့ကြတဲ့ ပြည်သူတွေကို ပြန်ကြည့်ပါ။ မျိုးဆက်တွေအဆင့်ဆင့် လက်ဆင့်ကမ်း တည်ဆောက်နေခဲ့ကြတဲ့ ဒီမိုကရေစီ စီမံကိန်းပန်းတိုင်ကြီး ဖြစ်ပါတယ်။ တိုက်ပွဲဝင်ခဲ့ကြသူတွေဟာ ငါတို့လူမျိုး၊ ငါတို့ဘာသာ၊ ငါတို့ပါတီအတွက် မဟုတ်ခဲ့ကြဘူး။ ကျဆုံးသွားကြတဲ့သူတွေဟာ တစုတဖွဲ့အတွက် မဟုတ်ဘဲ တနိုင်ငံလုံး စစ်အာဏာရှင်လက်အောက်က လွတ်မြောက်ရေး၊ စစ်မှန်တဲ့ ဒီမိုကရေစီစနစ် ထွန်းကားရေးဆိုတဲ့ မျှော်မှန်းချက်ကြီးနဲ့ လက်တွဲလာကြသူတွေ ဖြစ်ပါတယ်။ လူတိုင်းလူတိုင်း နှစ်နှစ်ခြိုက်ခြိုက် အိပ်စက်နိုင်စေဖို့၊ တန်းတူညီမျှ အခွင့်အရေးရဖို့၊ လူ့အခွင့်အရေး အပြည့်အဝခံစားနိုင်ဖို့ အသက်တွေ၊ ဘဝတွေရင်းပြီး ပါဝင်နေကြတာပါ။ တရုတ်ဖိအားကြောင့်၊ ဘယ်သူဘယ်ဝါကြောင့်လို့ ဆင်ခြေပေးပြီး ပြည်သူကို မျက်နှာလွှဲနေမယ့်အစား ပြည်သူ့မျက်နှာကို တည့်တည့်ကြည့်ကြပါ။ အားလုံးပါဝင်တဲ့ တနိုင်ငံလုံးလွတ်မြောက်ရေးအတွက် တိုက်ပွဲဝင်နေတဲ့ ပြည်သူတွေကို နိုင်ငံရေးအရ ဦးဆောင်မှုပေးနိုင်တဲ့ အစိုးရအဖြစ် NUG အသွင်ပြောင်းတာကို မျှော်နေပါတယ်။ #မြန်မာ #ဧရာဝတီ #NUG #ဒေါ်အောင်ဆန်းစုကြည် #PDF #WhatsHappeningInMyanmar This article is supported by the Transition Promotion Programme, the Ministry of Foreign Affairs of the Czech Republic. စာဖတ်သူများ၏ ပံ့ပိုးမှုက ပြည်သူများ လိုအပ်နေသည့် အကောင်းဆုံး နှင့် အရည်အသွေးမီ သတင်းများကို ဖော်ပြစေနိုင်မည်။ Support The Irrawaddy: https://bit.ly/3btQYpR