නව ලෝක රටාවකට ලංකාව සූදානම් ද ? | Ep 81

පවතින ගෝලීය සමාජ දේශපාලන පසුබිම තුළ - විශේෂයෙන්, දිනපතා වර්ධනය වෙමින් තිබෙන ගෝලීය බලපෑමක් සහිත යුදමය වාතාවරණය තුළ මෙතෙක් පැවති සමාජ දේශපාලන කතිකාව ද ඊට සමගාමී පරිවර්තනයකට මුහුණ දෙමින් ඇත.එම පරිවර්තනය සංකේතවත් කරමින් මේ වන විට දේශපාලන ශබ්දකෝෂයට ද නව අර්ථකතන සහ නව යෙදුම් රැසක් එක් වෙමින් ඇති අයුරු මේ දිනවල දැකගත හැකිය.එසේ නව අර්ථකතන ද සහිතව අවධාරණය වෙමින් තිබෙන එක් යෙදුමක් වන්නේ ලෝක පර්යායෙහි සිදුවෙමින් තිබෙන පරිවර්තනයයි, එමගින් බිහිකෙරෙන නව ලෝක පර්යායයි. (New World Order ) විශේෂයෙන් මේ මොහොතට අදාළව, එයින් අදහස් වන්නේ පවතින යුදමය තත්වය හේතුවෙන් ලෝක බල රටාවෙහි සිදුවෙමින් තිබෙන පරිවර්තනීය තත්වයයි. බැලූ බැල්මට දේශපාලන බලතුළනයෙහි සහ ආර්ථික ක්ෂේත්‍රයෙහි සිදුවන පෙරළියක් ලෙස පෙනුනද ඉන් ඔබ්බට මානව සංහතිය අත්පත් කරගත් බොහෝ වටිනාකම් සහ ජයග්‍රහණයන් ද මේ සමග අර්බුදයට යමින් තිබෙන අයුරු මේ වන විට නිරීක්ෂණය වේ. මේ සියල්ලෙන් පිළිබිඹු වන්නේ බිහිවෙමින් තිබෙන නව ලෝක තත්ත්වයක් වුවද , මේ උදාවන තත්ත්වයට මුහුණ දීම සඳහා ලංකාව වැනි රටක් කොතරම් දුරට සූදානම්ව සිටීදැයි ගැටලුවක් මේ වන විට මතුවෙමින් තිබේ. එය පවතින යුදමය තත්ත්වයට සීමා වන ගැටලුවක් ද නොවන බව ඉතිහාසීය අත්දැකීම් ඇසුරෙන් පැහැදිලි වේ.තමන් ඉදිරියෙහි වූ එම අවස්ථා නිසි ලෙස කළමනාකරණය කර ගනිමින් නිසි ඉලක්ක සපුරා ගැනීමේ හැකියාව ලංකාවට මෙතෙක් නොලැබුනු හේතුව කුමක්ද? එය හුදෙක් මෙරට දේශපාලන නායකත්ව⁣යෙහි උපාය මාර්ගික නොහැකියාවම ද? මේ මොහොතේ සිදුවෙමින් තිබෙන පරිවර්තනීය අවකාශය තුළ තමන්ට හිමි වන අවස්ථාව නිසි ලෙස කළමනාකරණය කරගනිමින් අනාගත ඉලක්ක සපුරා ගැනීමේ ඉඩක් මේ රටට තිබේද ? එහිලා මෙරට දේශපාලන නායකත්වයයහි අවධානයට ලක්විය යුතු මූලික කරුණු කවරෙක්ද ? වැනි ගැටලු කෙරෙහි මෙවර oneword සංවාදාත්මක වැඩසටහනෙහි අවධානය යොමු වී තිබේ.