පුරවැසියා, පරමාධිපත්‍ය සහ ජාතික රාජ්‍ය: මෙතැනින් කොතැනටද? | Ep 82

පසුගිය OneWord වැඩසටහන් කිහිපය පුරා සිදුවූ සංවාද මාලාවෙහි අන්තර්ගතය පොදු තේමාවකින් යුක්ත විය. ඒ 2026 පෙබරවාරි 28 වැනි දායින් ආරම්භ වී දින හතලිහකට ආසන්න කාලයක් නොකඩවා ඉදිරියට ගලා ආ ගෝලීය බලපෑමක් සහිත යුධමය තත්ත්වය හේතුවෙන් සමස්ත ලෝකය මුහුණ දී සිටින අර්බුදයෙහි ස්වභාවය හා ඉන් මතුවීමට නියමිත නව ලෝක තත්ත්වයෙහි ස්වභාවය පිළිබඳව තේමාවයි. මාර්තු මස හත් වනදා එහි හැරවුමක් පිළිබිඹු කරමින් සටන් විරාම තත්ත්වයක් ප්‍රකාශයට පත් වුවද එයට තිරසාර පැවැත්මක් නොවීය.පෙනෙන්නට ඇත්තේ යුධමය ගමන් මග වඩා සංකීර්ණ වන බවක් පමණි. මෙම පසුබිම තුළ , වැඩි වශයෙන් ජනමාධ්‍යයෙහි පවා අවධානය යොමු වී ඇත්තේ යුද්ධයෙන් සිදුකරන භෞතික බලපෑම- විශේෂයෙන්, ආර්ථික බලපෑම් පිළිබඳවයි.එහෙත් ඊට සමගාමීව සමස්ත මානව ඉතිහාසය පුරා මිනිස් වර්ගයා අත්පත් කරගත් මානවීය ජයග්‍රහණ රැසක් මෙම යුද්ධයට සමගාමීව අභියෝගයට ලක්වන අයුරු මෙහිදී ප්‍රමාණවත් ලෙස සමාජ දේශපාලන සංවාදයට බඳුන් වී නැත. විශේෂයෙන් අප මීට ඉහත ( 81 වැනි වැඩසටහන මගින්) සාකච්ඡා කළ පරිදි 1648 වසරේ ප්‍රකාශිත වෙස්ට්ෆේලියානු ගිවිසුම ඇසුරේ ගොඩනැගුනු ලෝක පර්යාය මේ වන විට බරපතල අභියෝගය කට මුහුණ දී ඇත. ජාතික රාජ්‍ය , ජනතාව සහ ස්වෛරීත්වය වැනි පද්ධතිමය සංකල්ප එක් අතකින් අර්බුදයකට ගමන් කරද්දී අනෙක් අනෙක් අතින් නව ලෝක පර්යායක අවශ්‍යතාව මතුවෙමින් තිබේ. එහෙත් පවතින අර්බුදය හමුවේ එවැනි බුද්ධිමය සංවාදයක් මතුවන සළකුණු ද පෙනෙන්නට නැත. පවතින යුදමය වාතාවරණය වර්ධනය වීමට පෙර පවා ජාතික රාජ්‍ය හා ස්⁣වෛරිත්වය වැනි සංකල්ප අභියෝගයකට හා කිසියම් පරිණාමීය අවදියකට මුහුණ දෙමින් නොසිටියා නොවේ.එහෙත් එම යුගයෙහි එතුළ අන්තර්ගත වූයේ වෙනත් හැඩ ගුණ රුවකි.යුධමය සන්දර්භයක් තුළ එය සිදුවන්නේ සපුරාම බලහත්කාරය මත පදනම් වූ වෙනත් හැඩ රුව ගුණයකිනි.මෙවර OneWord කතිකාවෙහි අවධානය යොමු වන්නේ ඒ කෙරෙහිය.