Biləsuvarda icra başçısı sahibkarlarla görüşüb

Biləsuvar rayon İcra Hakimiyyətinin başçısı Mahir Quliyev rayon sahibkarları, ziyalıları, ağsaqqalları və ictimaiyyətin nümayəndələri ilə görüş keçirib. Heydər Əliyev Mərkəzində baş tutan görüşdə ölkə rəhbərinin tapşırıq və tövsiyələrinə uyğun olaraq bütün regionlarda olduğu kimi Biləsuvarda da sahibkarlara hərtərəfli köməkliklər göstərilməsi ilə bağlı görülən işlər və həyata keçirilən tədbirlər haqqında ətraflı məlumat verilib. Rayonda özəl sahənin daha da inkişaf etdirilməsi və rəqabət qabiliyyətli olması üçün bundan sonra da sahibkarlara müvafiq köməkliklərin olunacağı bildirildi. Görüşdə çıxış edən rayon sakinləri prezident İlham Əliyevin anti-böhran tədbirləri, maaş və müavinətlərin artırılması, çörək və un məhsullarının qiymətlərinin tənzimlənməsi ilə bağlı sərəncamlarını alqışladıqlarını, bunların ölkə vətəndaşlarının həyat şəraitinin yaxşılaşmasına və sahibkarlığın inkişafina yaratdığı əlverişli şəraitə görə dövlət başçısına minnətdarlıqlarını ifadə ediblər. Sonda icra başçısı vətəndaşların müraciət və təkliflərini dinləyərək onların həlli ilə bağlı aidiyyəti məsul şəxslərə müvafiq tapşırıqlarını verdi.