Biləsuvarda ərzaq və kənd təsərrüfatı mallarının satışı yarmarkası keçirilib

Biləsuvar rayonunda ərzaq və kənd təsərrüfatı mallarının satışı yarmarkası keçirilib. Rayonun mərkəzində təşkil olunan yarmarka Biləsuvar rayon İcra Hakimiyyəti aparatının təşkilatçılığı ilə reallaşıb. Biləsuvarda keçirilən yarmarkaya 20-ə yaxın firma və müəssisənin çıxardığı məhsullar sakinlərə bazar qiymətindən də ucuz təklif olunub. Rayon İcra Hakimiyyəti başçısının müavini Elsəvər Həsənov deyir ki, yarmarkanın təşkilində məqsəd hər bir vətəndaşın büdcəsinə uyğun bazarlığı ucuz qiymətlərə almasına şərait yaratmaqdır. Yarmarkada əsasən gündəlik tələbat malları - un, yağ, ət, kartof, soğan və digər kənd təsərrüfatı və ərzaq malları alıcılara bazar qiymətindən 20-30% aşağı qiymətə təklif edilirdi. Yaradılan şəraitdən isə həm satıcılar həm də alıcılar razı idi. Bildirək ki, Biləsuvarda kənd təsərrüfatı məhsullarının satış yarmarkası hər ay bir dəfə olmaqla mütəmadi təşkil ediləcək. Növbəti yarmarkalarda firma və müəssisələrlə yanaşı məhsulların çeşidlərinin sayı da artırılacaq.