Biləsuvarda pambıqçılığın inkişafı ilə bağlı müşavirə

Biləsuvar rayonunda pambıqçılığın inkişafı ilə bağlı kənd təsərrüfatı mütəxəssislərı və mülkiyyətçilərlə görüş keçirilib. Rayon Heydər Əliyev Mərkəzində baş tutan görüşdə rayon İcra Hakimiyyətinin, “Aqrarkredit” Səhmdar Kredit Təşkilatının Salyan filialının nümayəndələri, rayonun aidiyyatı idarə müəssisə, təşkilatlarının, pambıq emalı zavodlarının rəhbərləri, bələdiyyələr, kənd təsərrüfatı mütəxəssisləri, sahibkarlar və mülkiyyətçilər iştirak ediblər. Görüşdə çıxış edən Biləsuvar rayon İcra Hakimiyyətinin başçısı Mahir Quliyev bildirib ki, dünyada neftin qiymətinin günü-gündən aşağı düşməsi ölkəmizdə qeyri-neft sektorunun, xüsusən kənd təsərrüfatının inkişafını zəruri edir. Kənd təsərrüfatının ən gəlirli sahələrindən olan pambıqçılığın dirçəldilməsi artıq zamanın tələbidir. O, Biləsuvarın kənd təsərrüfatı rayonu olduğunu qeyd edərək bildirdi ki, xüsusilə pambıqçılıq Biləsuvar rayonunda becərilən ənənəvi kənd təsərrüfatı sahəsidir. Həmçinin qeyd olundu ki, pambıqçılıqla məşğul olan fermerlərə toxum, gübrə alınmasında, aqrotexniki işlərin aparılmasında dövlət tərəfindən müvafiq köməkliklərin göstərilməsi, fermerlərin və emal müəssisələrin güzəştli şərtlərlə maliyyələşdirilməsi ilə bağlı müəyyən tədbirlər hazırlanır. Görüşdə çıxış edən pambıq mülkiyyətçiləri də öz növbələrində bu sahənin inkişafı ilə bağlı dövlət başçısının diqqət və qayğısını razılıq hissi ilə qarşıladıqlarını bildirdilər və görülən bütün bu işlərin sonda ölkə vətəndaşlarının həyat şəraitinin yaxşılaşmasına xidmət etdiyini qeyd etdilər. Sonda ayrı-ayrı mülkiyyətçilər tərəfindən səsləndirilən problemlər ümumləşdirilərək icrası nəzarətə götürüldü.