අමුතු ගිවිසුම 📃 - දාසයවෙනි කොටස #story #writing #relaxing

අමුතු ගිවිසුම 📃 - දාසයවෙනි කොටස "මට සමාවෙන්න." යැයි කී ඇය ආපසු හැරී නොබලා එතැනින් ඉවතට ගියාය. ​ඉෂාන්ගේ දෑස් අහස දෙසට හැරුණි.ඉතිරි වූයේ ඔහු සහ ඔහුගේ නිශ්ශබ්දතාවය පමණි.මොහොතකට ඔහු දෑස් පියාගෙන දිගු හුස්මක් ගත්තේය. ​ඔහු ඔහුගේ ජීවිතයේ සිටි බොහෝ මිනිසුන්ව ප්‍රතික්ෂේප කර තිබුණි, එමෙන්ම තමන් කිසිම වටිනාකමක් නැති කෙනෙකු ලෙස හැඟවූ බොහෝ මිනිසුන්ව තම ජීවිතයෙන් ඈත්කර තිබුණි. නමුත් ආශිට එසේ පැවසීම ගැන නම් ස්ථිරවම ඔහු තුළ වරදකාරී හැඟීමක් ඇති වෙමින් තිබුණි.එලෙස දැනෙන්නේ ඇයිදැයි ඔහු දැන සිටියේ නැත. ආශි ප්‍රශ්නයක් ඇති කර ගැනීමට අකමැති වූ නිසාම කෙලින්ම ඇගේ කාමරයට ගියාය. ඇය සිතුවේ එය ඇගේ වැරැද්දක් ලෙසයි.ඔවුන් අතර දැනට පවතින ගිවිසුම් ගත බැදීම ඇය අමතක කල බවයි. ​ඇය ඇඳ මතට නැඟී ඇතිරිල්ල ඇගේ දණහිස දක්වා ඇදගෙන වැතිරුණාය. ඇගේ දෑස්වල කඳුළු පිරී නාසය දිගේ පහළට ගලා ගියේය. ​මඳ වේලාවකට පසු, දොර "ක්ලික්" හඬින් ඇරී වැසෙනු ඇයට ඇසුණු අතර ඉෂාන්ගේ දෑස් තමා දෙස යොමුව ඇති බව ඇයට දැනුණි. ඇය ඉතා සෙමින් දෑස් පියාගත් අතර, එයින් ඉෂාන් දුටුවේ ඇයට නින්ද ගොස් ඇති බවයි. ආශි ඇගේ දෑස් නොඇර සිටීමට දැඩි උත්සාහයක් ගන්නා බව ඉෂාන් දුටුවේය. ඇයව නොසලකා හරිමින් ඔහු ඇය අසලින් ඇඳට ගොඩ වූ අතර, ඇගේ දෑස් අසල කඳුළු දිලිසෙනු ඔහුට පෙනුණි. ​ඔහු තුළ වරදකාරී හැඟීමක් ඇති වුවද, ඔහු එයද නොසලකා හැරියේය. ඇයට එහි එන්නැයි ආරාධනා කළේ ඔහුම වන අතර, පසුව ඇයට තමන්ව තනි කර දමා යන ලෙස වක්‍රව පැවසුවේද ඔහුය. ඒ ගැන ඔහුට කණගාටුවක් දැණුන නමුත් ඔහුගේ උඩඟු පිරිමි ආත්මාභිමානය නිසා ඔහු එය නොසලකා හැරීමට තීරණය කළේය. ​තමා අසලින් ඇඳ පහත් වන බව අශිට දැනුණු අතර, ඉෂාන්ද නිදා ගැනීමට සූදානම් වන බව ඇය දැනගත්තේ එලෙසිනි. ​පසුගිය වතාවේ ඔවුන් එකට නිදාගත් අවස්ථාවේ මෙන්ම, උදෑසන තමා අවසානයේ ඔහුව බදාගෙන සිටිනු ඇතැයි ඇය දැන සිටි නිසා ඇය ඇඳෙන් නැගිට්ටාය. ​ඇඳ ඇතිරිලි තිබෙන බව ඉෂාන් පැවසූ ලාච්චුව ඇය විවෘත කර, ඒවා ඇගේ දෑතට ගත්තාය. ​ඇය එම ඇතිරිලි ද රැගෙන ඇවිද යන අයුරු ඉෂාන් බලා සිටි අතර, ඇය ඒවා ඇඳ අසලින් පිළිවෙලකට බිම එලුවාය. ​වාසනාවකට මෙන් කාමරය විශාල විය. එය කෙතරම් විශාලද යත් ඇයට නිදා ගැනීමට ඕනෑතරම් ඉඩකඩ තිබුණි. ​ඉෂාන් ඊට විරුද්ධත්වයක් නොපෙන්වූ නමුත්, ඇයව වඩාගෙන අවුත් එකම ඇඳේ නිදාගන්නැයි පැවසීමට ඔහුට සිතුණි. එහෙත් ඔහු එසේ නොකළේය. මන්ද ඔහු එසේ කළහොත් නැවතත් සියල්ල අවුල් කරගන්නා බව ඔහු දැන සිටියේය. ​ඇය බිම වැතිරෙන විට ඉෂාන් තමා දෙස බලා සිටිනු දුටු නිසා අශිගේ මුහුණෙන් දැඩි වේදනාවක් දිස්විය.එසේ තිබියදීත්, ඔහු ඇයට තමා අසලින් නිදාගන්නැයි ඇවිටිලි කළේ නැත. ඇයට ඇය ගැනම අනුකම්පාවක් දැනී සිනහවක් පහළ විය. ​පසුදා උදෑසන, තමන් දෙදෙනා එකට නිදා නොගන්නා බව පවුලේ සාමාජිකයන්ට දැන ගැනීමට ඉඩ නොදීමේ අදහසින් ආශි වේලාසනින් අවදි වූවාය. ​ඉෂාන් දිගටම නිදා සිටි අතර මදක් දහවල් වී ඔහු අවදි වන විට කාමරය හිස්ව තිබුණි. ඔහු දෑස් පිරිමදිමින්,පවුලේ සැම සමඟ උදේ ආහාරය ගැනීම සඳහා සූදානම් විය. ​ඔහු සෙමින් පහළට ගිය අතර, මිනිසුන්ගෙන් පිරී තිබූ ශාලාවේදී ඔහුට මුලින්ම දැකගත හැකි වූයේ අශිවයි. ඇය ඉෂා සමග වාඩි වී සිනාසෙමින් සිටියාය. එය මදක් නතර වී බලා සිටීමට තරම් මනරම් දසුනක් විය. මොහොතකින් ​කවුරුන් හෝ බලා සිටිනවාක් මෙන් දැනුණු ආශි ඇගේ දෑස් කාමරය පුරා යැවූ අතර අනෙක් කෙළවරේ සිටි ඉෂාන්ගේ දෑස් සමඟ ගැටුණි.හදිසියේම ඇගේ සිනහව මැලවී ගියේය. එසේ වුවද, ඉෂාන්ව පළමු වතාවට සුදු පැහැති කුර්තාවකින් දැකීමෙන් ඇගේ බඩ තුළ සමනලුන් රෑනක් කලබලයෙන් පියාඹන්නාක් වැනි හැඟීමක් ඇයට ඇති විය. නමුත් ඇය එය පිටතට නොපෙන්වා සිටීමට පරිස්සම් විය. ✍️හසිනි ප්‍රේමරත්න #storytime #writing #books #relaxing #holiday #books #story #booktok