(නො)බැඳි - පස්වෙනි කොටස #story #writing #relaxing

(නො)බැඳි - පස්වෙනි කොටස "පුතේ.." "ම්ම්ම්..ඇයි අම්මා?" ඊයේ රාත්‍රියේ නින්දට වැටුන හිරුදි අවදි වූයේ ඇගේ මවගේ ආදරණීය ආමන්ත්‍රණයෙනි. "දැන් ඔයාට කොහොමද?වෙනදා වෙලාවට ඇහැරුනේ නැති නිසා මම කතා කරේ.අක්කා අද ගෙදර ඉන්නවා.රෑ ඔයාගේ ඇගත් රත් වෙලා තිබ්බේ.දැන් නං අඩුයි වගේ." "අම්මා කොහේ හරි යන්නද?" "ඔව් පුතේ.මට අද සුසිලා නැන්දා එහේ එන්න පුලුවන්ද ඇහුවා රමායා අක්කා මැරි කරන්න ඉන්න අයියාගේ ගෙදරින් එනවා කියලා." සුසිලා යනු හිරුදිගේ මවගේ කුඩා කල සිටම හොදම මිතුරියයි.ඇයද දියණියන් දෙදෙනෙකුගේ මවක් වූ අතර පවුල් දෙකේම කුමනාකාරයේ කාර්‍යයක් යෙදුනද ඒ දෙදෙනාම සහභාගි වීම දීර්ඝ කාලීනව සිදු වූ ක්‍රියාවකි. "හ්ම්ම්..එහෙනම් හවස් වෙයි නේද අම්මා එන්න?" "ඔව්.ඒත් අක්කා ඉන්නවා.ආයේ ඇග රත් උනොත් හංදියේ පතිරණ මහත්තයාගෙන් බේත් ටිකක් අරන් එන්න අක්කා එක්ක ගිහින්.මං කියලා තියෙන්නේ අක්කට." "හ්ම්ම්..ඕනි වෙන එකක් නෑ අම්මේ.ඊයේ මහන්සියට ඇග රත් වෙන්න ඇත්තේ.දැන් අවුලක් නෑ.ඔලුව රිදෙන්නෙත් නෑ." "හරි.එහෙනම් මං යනවා.ආයේ නිදාගන්නවා නං කාලා නිදාගන්න.තරුලිත් මට ගත්තා ඔයාගේ ෆෝන් එක ඕෆ් කියලා." ****** "දෙයියනේ මට රෑ උණ ගැනිලද.අම්මලාට සැක හිතුනද දන්නෙත් නෑ.හිසේ ඇම්මට නිදාගත්තා මිසක ෆෝන් එක අමතක උනානේ.අයියත් ගන්න ඇති.තවත් මේක හංගන් ඉන්න මට බෑ.ඊයේ උනදේ එක්ක මට සෑහෙන්න අවුල් ගියා.කොහොමත් තීරණයක් ගන්න කලින් අක්කා එක්ක මං මේ ගැන කතා කරනවා." අවුරුදු 23ක රූමත් තරුණියක් වූ හිරුදි හැදී වැඩුනේ ඇගේ මවත් වැඩිමල් සහෝදරියත් සමගිනි.ඇයට දැනුම් තේරුම් ඇති කාලයේ සිටම ඇගේ පියා සිටියේ විදේශ ගතවයි.එහෙයින් ඔවුන්ට මුදල් අඩුපාඩු නොවුනද පිය සෙනෙහස වැඩියෙන්ම අහිමිව ගොස් තිබුනේ හිරුදිටයි. ඇය ඇගේ බොහොමයක් රහස් බෙදාහදා ගත්තේ ඇගේ සොයුරිය වූ අරුණි සමගයි.ඇයද විසිහත් හැවිරිදි පුද්ගලික අංශයේ රැකියාවක නියතුව සිටින තරුණියකි.තම එකම නැඟණිය රාත්‍රියේ අසනීප වූ නිසාත් මවට ඇයගේ මිතුරියගේ නිවසට යාමට අවශ්‍යව තිබූ නිසාත් එදින ඇය හිරුදි සමග සිටීමට නිවාඩුවක් ලබාගෙන තිබුනි.ඇයට තම සොයුරිය තමාගේ පණ මෙනි. "අක්කේ...!" "ඕ...මොකෝ පොඩ්ඩි, ආයෙම අමාරුද?" "නෑ අක්කේ.මට ඔයාට කියන්න දෙයක් තියෙනවා." "පහුගිය ටිකේ හොරෙන් හොරෙන් කුටු කුටු ගාද්දි මට හිතුනා ඉක්මනටම අපිට කියන්න දෙයක් ඔයාට හම්බෙලා කියලා." "හ්ම්ම්..ඔයාට ඒකනේ මං ආදරේ." "හරි හරි බටර් නොගා කියන්නකෝ.මොකෝ කොල්ලෙක්වත් හම්බුනාද?" "අනේ මට සමාවෙන්න ලොකූ.මං හැමදේම ඔයා එක්ක කිව්වට මේක ගැන කියන්න බය උනා.මට affair එකක් තියේ.එයා සාරංග.ඔයාගේ වයසෙමයි.එයා කළුතර.එයා ග්‍රැෆික් ඩිසයිනර් කෙනෙක්.මං ඊයේ මුල්ම වතාවට එයාව හම්බුනා." "හරි ශෝක් පොඩ්ඩි.සේරම දේවල් කරලද අක්කට කියන්නේ.ඊයේ මං එද්දි හිසේ ඇම්ම කියලා නිදාගන්න තරං ඊයේ මොනාද උනේ?කොහෙද ගියේ?තරුලි ආවේ නෑ නේද?මට හිතුනා ඊයේ රෑ එයා අම්මට ගද්දි." මදක් කේන්තිය මුසු වූ හඩකින් අරුණි විසින් ඇයගේ ප්‍රාණ සම වූ නැගනියගෙන් ප්‍රශ්න වැලක් අසාගෙන ගියාය. "අනේ අක්කේ එහෙම මුකුත් උනේ නෑ.තරුලි ආවේ නෑ.ඒත් මං එයාට කියලා ගියේ.අපි ගියේ වන් ගෝල් ෆේස් එකටයි ගෝල් ෆේස් එකටයි.අර මල් දුන්නෙත් එයා.අර හාවත් දුන්නේ එයා." "ඒවා දැක්ක ගමන් මටත් හිතුනා පොඩී.මට විතරක් නෙමෙයි අම්මටත් හිතිලා.එයත් මට කිව්වා.මං අද ගෙදර හිටියෙත් ඒකයි.දිගටම කියන්න.මොකද්ද උනේ?" "අපි නෙලුම් කුළුන බලන්න ගිහින් පහලට ඇවිත් වාඩි වෙලා ටිකක් වෙලා කතා කර කර ඉද්දි එයා අයිස්ක්‍රීම් ගේන්න ගියා.මං එතකොට එයාගේ ID එක බලන්න පර්ස් එක අදිනකොට ඒක අස්සේ එයාගේ කලින් ගෑනු ලමයගේ photo එකක් තිබුනා.මට සෑහෙන්න දුක හිතුනා ලොකූ.ඊයේ තමයි මං එයාව මුලින්ම හම්බුනේ.මං එහෙම්ම ගෙදර ආවා.එද්දි හොදටම හිසේ ඇම්ම නිසා මං නිදාගත්තා.phone එක ඕෆ් වෙලා.ඒකත් මේ ඔන් කරන්න කලින් මං ඔයා එක්ක කතා කරේ." "හරි.මට කියන්නකෝ ඔයාට එයාව හම්බුනේ කොහොමද කියලා.කොච්චර කල්ද සම්බන්දෙට?ඔයා කෝස් එක ඉවර උනාට පස්සේ හිටියේ ගෙදරනේ.කොහොමද මෙහෙම උනේ?ආ පොඩී?" "මට එයාව හම්බුනේ ෆේස් බුක් එකෙන් ලොකූ.ඒකත් වැරදීමකින් මෙන්ශන් වෙලා."හිරුදී දෑස් වල කදුලු පුරවාගෙන පැවසුවාය. "මොකද්ද..!" පුදුමයෙන් විසල් වූ දෙනෙත් හිරුදි දෙසට හෙලමින් අරුණි කෑගැසුවාය. "අනේ ලොකූ එයා හොදයි."හඩමින් හිරුදි පැවසුවද ඒ වන විටත් අරුණි කාමරයෙන් පිටතට ගොස් තිබුනි.ඇය තම අත්බෑගය තුල වූ දුරකථනය ගෙන එය චාජරයට සවි කොට ඔන් කලාය. තරුලිගෙන් සහ සාරංගගෙන් ගණන් කල නොහැකි තරමට කෙටි පණිවිඩ සහ ඇමතුම් ලැබී තිබුනි.සාරංග බොහොමයක් පණිවිඩ තුලින් හිරුදිගෙන් සමාව අයැද තිබුනේය. ඒ කිසිදු පනිවිඩයකට පිලිතුරු නොදුන් ඇය " මම අපි ගැන අක්කට කිව්වා." යැයි පමණක් කෙටි පණිවිඩයක් ලෙස සාරංගට යැවීය. ✍️ හසිනි ප්‍රේමරත්න #writing #relaxing #happiness #books #story #booktok