(නො)බැඳි - සිව්වන කොටස #story #writing #relaxing

(නො)බැඳි - සිව්වෙනි කොටස සාරංග එනතුරු ඔහුගේ පසුම්බිය පිරික්සූ හිරුදිට එහි කුඩා පොකට්ටුවක් තුල වූ ඔහුගේ පවුලේ ඡායාරූපයක් හමු විය. එය පිරික්සා බැලීමට සිතා ඇය එය අතට ගැනීමට උත්සාහ කල අතර එය පිටුපස තවත් කුඩා ඡායාරූපයක් ඇති බව දුටුවාය. ඇගේ දෙනෙතට ඇසිල්ලකින් කදුලු පිරීමට හේතු වූයේ එම ඡායාරූපයයි. "දෙයියනේ! මේ වාසනා අක්කාගේ පිංතූරයක් නේද?එතකොට අයියා ඇයි තාමත් මේක තියන් ඉන්නේ. මාව හම්බෙන්න මුලින්ම එන දවසෙත් අරන් එන්න තරං අයියට එයාව ඕනිද. ඒත් දෙයියනේ එයා මට කිව්වේ ඒ සම්බන්දේ ඉවර වෙලා හුගක් කල් කියලනේ.කමක් නෑ.අහලම බලමු." සාරංගට හිරුදිව හමුවීමට පෙර වසර කීපයක් ගත වූ ප්‍රේම සම්බන්ධයක් තිබූ අතර දෙපාර්ශවයේම ඇති වූ යම් යම් ගැටලුකාරී තත්ත්වයන් නිසා එම සම්බන්ධය නැවතී තිබුනි. ඔහුට හිරුදිව හමුව තිබුනේද එම සම්බන්ධය නතර වී වැඩි දිනක් යාමට මත්තෙනි.ඇතිව තිබූ සිත් තැවුල් මගහරවා ගැනීමට ඔහු හිරුදිව තොරාගෙන තිබූ අතර කාලයක් තිස්සේ ඔහුගේ පසුම්බිය තුල වූ වාසනාගේ ඡායාරූපය හිරුදි සමග යොදාගත් මුල්ම හමුවට ඒමේදී ඉවත් කිරීමට ඔහුට මුළුමනින්ම අමතකව ගොස් තිබුනි. "අයියෝ, මං පර්ස් එක හිරුදිට දීලානේ ආවේ.ඇතුල බැලුවොත් නං සේරම ඉවරයි.මට අමතක උනානේ වාසනාගේ photo එක අහක් කරන්න.එයාව අමතක කරන්න හිතාගෙන හිරුදිට ලං උනාට දැන් මාත් හිරුදිට ආදරෙයිනේ.යන්තං මූණෙ හිනාවක් ආවා විතරයි අද. ඕක දැක්කොත් නං විසුමක් වෙන් නෑ.කෝකටත් වාසනාගේ contact number එක ඩිලිට් කරලම යන්න ඕනි.ඒකත් තවම සුදු නංගි කියලා photo එකත් එක්ක සේව් කරපු ගමන්නේ තියෙන්නේ." ***************** "අහ් හිරුදි කෝල් අරන්.දෙයියනේ වාසනා ගැන කල්පනාවෙන් හිටියා මිසක් phone එක බැලුවේ නෑනේ." "හෙලෝ සුදූ, ඔයා කෝල් අරන්.මේක සයිලන්ට් කරානේ මං ඔයාව උදේ හම්බුන ගමන්.නැත්තං ඔෆිස් එකෙන් හදිසි වැඩ කරලා එවන්න කියලා කෝල් කරනවනේ.!" "කමක් නෑ අයියේ.ඔයා පේන්න නැති නිසා ගත්තේ.මට පේන දුරටනේ යනවා කිව්වේ." "ඒ පෙන්නපු ස්ටෝල් එකේ කෝන් අයිස් නෑ සුදූ.ටිකක් එහාට යන්න වුනා.දැන් මේ එන ගමන්.කිට්ටුව ඉන්නේ." "හ්ම්ම්,ඉක්මනට එන්න." "කට් කරානේ.කට හඩත් පොඩ්ඩක් වෙනස් වෙලා.අඩලද මන්දා.photo එක දැකලද මන්දා.දැන් මොනා කරන්නද.මටත් හොද වැඩේ සිහියක් නැතුවට.කොහොම උත්තර දෙන්නද මන්දා මේවට." ***************** "ම්ම්ම් අර ඉන්නේ වාඩිවෙලා.බර කල්පනාවක වගේ ඉන්නෙත්." "සුදූ, බය උනාද පේන්න නැති උනාම? මොනාද කල්පනා කරන්නේ?" "නෑ.එන්න කියන්න කෝල් කරේ." "සොරි.පොඩ්ඩක් එහාට යන්න උනානේ.ඔයා ආසම ෆ්ලේවර් එකෙන් ගෙනාවේ." "දැන් මට ඕන් නෑ අයියේ.මේ මොකද්ද කියන්න?මාව හම්බෙන්න ආපු මුල්ම දවසෙත් මේක අරන් එන්න තරං ඔයාගේ හිතේ ඉන්නේ එයාද?මං පර්ස් එක ගත්තේ ඔයාගේ ID එක බලන්න.වෙලාවට මට ඒක හිතුනේ.නැත්තං මං මේක දකින් නෑනේ." "අනේ සුදූ අඩන්න එපා.අහන්නකෝ එහෙම දෙයක් දැන් නෑ.මේක එයා එක්ක ඉන්න කාලේ දාගත්තු එකක්.එයා ලගත් මගේ එකක් තිබ්බා.අනේ මට ඇත්තටම ඒක අහක් කරන්න මතක් උනේ නෑ සුදූ.ඕක අස්සේ තිබ්බට මම ඕක අදින් නැති නිසා ගානක් උනේ නෑ.ප්ලීස් හිත රිදෝගන්න එපා." " එච්චරටම අමතක වෙනද අයියේ ඔයාට?ඔයා එයා නැති පාලුව මකාගන්නද මා එක්ක ඉන්නේ?මං ගැන ගානක් නැත්තේ ඒ නිසාද.රස්සාව හම්බුනත් හරි ඔයාට මා එක්ක කතාවත් කරන්න වෙලාවක්වත් හදාගන්න ඕනි උනේ නෑ.ඒ ඔයා එයාව අමතක කරන්න මා එක්ක හිටපු නිසා නේද?" "මොනාද මේ කියන්නේ සුදූ.එහෙම මගුලක් නෑ." "ප්ලීස් අපි ගෙදර යං.මට තව මෙතන ඉන්න ඕනි නෑ." "ඒත් සුදූ තව හුගක් වෙලා තියෙනවනේ.අපි කතා උනේ මෙහෙම නෙමෙයිනේ." "ඔව් ඒක ඇත්ත.මාත් මෙහෙම දෙයක් බලාපොරොත්තු උනේ නෑනේ.ඔයා එහෙනම් ඉන්න.මං යන්නම්." එසේ පැවසූ ඇය හුන් තැනින් නැගට වේගවත් ගමනෙන් මහාමාර්ගය දෙසට ඇවිද ගියාය.සාරංගටද ඒ අවස්ථාවේ ඇයට ඉඩදෙනු විනා වෙන කිරීමට කිසිවක් ඉතුරුව නොතිබුනි.එනිසා ඔහුද ඇගේ පිටු පසින් දිවගොස් ඇය ගොඩවූ බස් රථයට ගොඩ විය. ගමනාන්තය තෙක්ම ඔවුන් දෙදෙනා එකම අසුනේ සිටියද දෙදෙනාම දැඩිලෙස නිහඩ විය.වරින් වර හිරුදි නහය උඩට අදිමින් ඇගේ දෑස් වලින් ගැලූ කදුලු පිසදමන්නට විය.තමාගේ අසිහිය නිසා සිදූ වූ දෙයට කුමක් කරන්නදැයි ඔහුටද කිසිදු අදහසක් නොවීය. අවසානයේදී හිනහවකින් ඉතා සතුටින් ආරම්භ කල දිනය ඔවුන්ට වේදනාවක් දෙමින් අවසන් විය. නිවසට ගිය මොහොතේ සිට සාරංග කෙතරම් හිරුදිට ඇමතුම් ලබා ගත්තත් ඇය ඔහු සමග කතා නොකල අතර අවසානයේදී ඇගේ ජංගම දුරකථනය ක්‍රියා විරහිත කර තිබුනි. ඔහුගේ පැත්තෙන් එය එසේ වුවද නිවසට යන විටත් හිරුදි සිටියේ ඉවසිය නොහැකි හිසේ ඇම්මකින් පීඩාවට පත්වෙමිනි.එනිසා නිවසට ගිය වහා ඇය පෙනඩෝල් පෙති දෙකක් ගිල දමා නින්දට වැටී තිබුනි.සිය ජංගම දුරකථනය ගැන වගේ වගක් නොතිබූ ඇයට සියල්ල විසදාගැනීමට පෙර පැය කීපයක සුව නින්දක් අවශ්‍යව තිබුනි. නිවැසියන්ගෙන්ද ඇයට ඒ සදහා බාධාවක් නොවූ අතර පැයකට පමන පසුව අවදි වූ ඇය ඇග පත සෝදා සැහැල්ලු ඇගලුමකින් සැරසී රාත්‍රි ආහාරයද ප්‍රතික්ෂේප කර නැවත නින්දට වැටුනු අතර තම ජංගම දුරකථනය ඇය සිතාමතාම අමතක කර දමා තිබුනි. ✍️හසිනි ප්‍රේමරත්න #storytime #writing #relaxing #books #story #booktok