ဗန်းမော်နဲ့ ဖားကန့်က ကချင်စစ်ရေး နောက်ဆုံးအခြေအနေ

ဗန်းမော်နဲ့ ဖားကန့်က ကချင်စစ်ရေး နောက်ဆုံးအခြေအနေ ----- ကချင်လွတ်လပ်ရေးတပ်မတော် KIA က ထိုးစစ်ဆင်နေတဲ့ ဗန်းမော်မြို့မှာ စစ်ကောင်စီက ရဟတ်ယာဉ်တွေနဲ့ စစ်ကူအင်အားပို့နေသလို၊ မြန်မာပြည်ရဲ့ ကျောက်စိမ်းထွက်ရှိရာ ဖားကန့်ဒေသကိုလည်း အပြည့်အဝ ထိန်းချုပ်နိုင်ဖို့ စစ်ကောင်စီက အင်အား ၆၀၀ကျော်နဲ့ ထိုးစစ်ဆင်လာတာကြောင့် ကချင်ပြည်နယ်ထဲမှာ တိုက်ပွဲတွေ ဆက်လက်ပြင်းထန်နေပါတယ်။ ဖားကန့်ဒေသမှာတိုက်ပွဲပြင်းထန်နေသလို ၅လဝန်းကျင်ကြာမြင့်လာတဲ့ ဗန်းမော်မြို့သိမ်းတိုက်ပွဲဟာလည်း ဆက်လက်ပြင်းထန်နေပြီး၊ စစ်ကောင်စီက လေကြောင်းကနေ အင်အားထပ်ဖြည့်နေတာပါ။ ဗန်းမော်မြို့က စစ်ကောင်စီရဲ့ အဓိကစခန်းကြီးဖြစ်တဲ့ အမှတ်(၂၁)စစ်ဆင်ရေးကွပ်ကဲမှုဌာနချုပ်ထဲကို ဧပြီလ ၃ရက်နေ့မှာ စစ်ကောင်စီက ရဟတ်ယာဉ် ၃စင်းနဲ့ စစ်ကူအင်အား ၇၀လောက် ပို့ဆောင်ထားပြီး မြို့တွင်း နေရာတချို့နဲ့ စစ်ကောင်စီတပ်စခန်းတချို့မှာလည်း တိုက်ပွဲတွေ ဆက်လက်ပြင်းထန်နေတယ်လို့ KIA ရဲ့ပြောခွင့်ရ ဗိုလ်မှူးကြီးနော်ဘူက ပြောပါတယ်။ ဗန်းမော်တိုက်ပွဲအတွင်း စစ်ကောင်စီတပ်က ထိခိုက်၊ သေဆုံးမှုများပြားနေသလို၊ KIA နဲ့ မဟာမိတ်တွေရဲ့ ဝိုင်းပတ်ပိတ်ဆို့ခံထားရလို့ တပ်တွင်းပိတ်မိနေတဲ့ အခြေအနေတွေကြောင့် အောက်ခြေရဲဘော်တွေ စိတ်ဓာတ်ကျနေတယ်လို့ အတွင်းသတင်းရထားကြောင်းလည်း ဗိုလ်မှူးကြီးနော်ဘူက ဆက်ပြောပါတယ်။ တစ်ဖက်မှာလည်း ကချင်လွတ်လပ်ရေးတပ်မတော် KIA နဲ့ ကချင်ဒေသပြည်သူ့ကာကွယ်ရေးတပ် KPDF ပူးပေါင်းတပ်တွေရှိနေတဲ့ ဖားကန့်မြို့ အဝင်၊ အထွက်လမ်းတွေကို ပြန်ထိန်းချုပ်ဖို့ အင်အား ၆၀၀ကျော်တဲ့ စစ်ကောင်စီစစ်ကြောင်းဟာ ဖားကန့်မြို့ကို ဦးတည်လာတာကြောင့် အခုရက်ပိုင်းအတွင်း နေ့စဉ်တိုက်ပွဲတွေ ပြင်းထန်နေပါတယ်။ ဧပြီလ ၂၃ရက်နေ့က ဖားကန့်မြို့အရှေ့ဘက် မိုင် ၄၀ကျော်အကွာက ကာမိုင်းမြို့ကနေ ထွက်ခွာလာတဲ့ စစ်ကောင်စီစစ်ကြောင်းဟာ သီတင်းနှစ်ပတ်အကြာမှာတော့ ဖားကန့်-ကာမိုင်းလမ်းပိုင်းရဲ့ တစ်ဝက်လောက်ကို ရောက်လာပါတယ်။ လက်ရှိမှာတော့ ဖားကန့်မြို့အရှေ့ဘက် ၂၂မိုင်ခန့်အကွာက ကပ်မှော်ရွာအနီးကို မေလ ၃ရက်နေ့က ရောက်လာပြီလို့ KIA နဲ့ နီးစပ်တဲ့ ဖားကန့်ဒေသခံအမျိုးသားတစ်ဦးက ပြောပါတယ်။ နာမည်ကျော် ၁၀၂၇ စစ်ဆင်ရေး ဖော်ဆောင်ခဲ့တဲ့ ရှမ်းပြည်နယ်မြောက်ပိုင်းက ကိုးကန့်တပ် MNDAA နဲ့ တအာင်းတပ် TNLA တို့ တရုတ်အစိုးရရဲ့ ဖိအားကို ရင်ဆိုင်နေရချိန်မှာ ကချင်ပြည်နယ်မှာတော့ KIA က မြို့သိမ်းတိုက်ပွဲ ဆက်လက်ဆင်နွှဲနေပါတယ်။ စစ်တပ်အာဏာသိမ်းပြီး ၃နှစ်အကြာ ၂၀၂၄နှစ်ဆန်းပိုင်းကစပြီး KIA နဲ့ ပူးပေါင်းတပ်တွေဟာ ကချင်ပြည်နယ်အတွင်း မြို့သိမ်းစစ်ဆင်ရေးတွေကို အရှိန်မြှင့်ခဲ့တာပါ။ မင်းအောင်၊ စထွန်းအောင်/Myanmar Now