စစ်တပ်ရဲ့ ချင်းတောင်ထိုးစစ်ကို တော်လှန်ရေးအဖွဲ့တွေရိုက်ချိုး | People's Spring

စစ်တပ်ရဲ့ ချင်းတောင်ထိုးစစ်ကို တော်လှန်ရေးအဖွဲ့တွေရိုက်ချိုး နေ့သစ်/People's Spring အာဏာသိမ်းစစ်တပ်ရဲ့ ချင်းပြည်နယ်တောင်ပိုင်းထိုးစစ်ဟာ သေဆုံး၊ဒဏ်ရာရ စစ်သားရာနဲ့ချီ ရှိခဲ့ပြီး စစ်ကြောင်းလန်ကျသွားတယ်လို့ ချင်းပြည်သူ့အစည်းအရုံး/ချင်းပြည်သူ့တပ်မတော်(CPU/CPA )က ဇူလိုင် ၂ ရက်မှာ တားဝင်ထုတ်ပြန်လိုက်ပါတယ် ။ တပ်ချုပ်သစ် ရဲဝင်းဦးလက်ထက်မှာ စစ်တပ်ထိုးစစ်လန်ကျပြီး မရှုမလှ အထိနာခဲ့တာက ချင်းပြည်နယ်တောင်ပိုင်းကပထမဆုံးတော့မဟုတ်ပါဘူး။ရခိုင်ပြည်နယ်၊ကျောက်ဖြူမြို့နယ်မှာ ကျောက်ဖြူနဲ့ ရမ်းဗြဲမြို့ကြားက ဗျူဟာမြောက်တည်ရှိတဲ့ စနဲမြို့ကို စစ်တပ်က ပြန်သိမ်းဖို့ ၂၀၂၆ မေလ မှာကြည်း၊ရေ၊လေ ပူးပေါင်းစစ်ဆင်ရေးဟာ အာရက္ခတပ်တော်ရဲ့ မာကျောလှတဲ့ တိုက်စွမ်းရည်ကြောင့် ထိုးစစ်လန်ကျခဲ့တာက တပ်ချုပ်ရဲဝင်ဦးအတွက် ပထမဆုံးရှုံးပွဲဖြစ်ပါတယ်။ စနဲမြို့ကို မရတဲ့အပြင် စစ်တပ်စစ်ကြောင်းတွေဟာ AA ရဲ့တန်ပြန်ထိုးစစ်ကြောင့် တောင်မော်ဦးရေတပ်စခန်းနားအထိ ပြန်ဆုတ်ရပါတယ်။ဒါအပြင် ရေတပ်စခန်းကိုပါ AA ကသိမ်းပိုက်ဖို့ ကာကင်းစခန်းတွေကိုတန်ပြန်ထိုးစစ်ဆင် ဖိအားပေးနေတာကို စစ်တပ်ရင်ဆိုင်နေရပြီဖြစ်ပါတယ် ။ စနဲ ထိုးစစ်လန်ကျပြီး ရက်ပိုင်းအကြာမှာပဲစစ်တပ်က ချင်းပြည်နယ် တောင်ပိုင်းက ကန်ပက်လက်မြို့နယ် နဲ့ မင်းတပ်မြို့နယ်တို့ကို အင်အားထောင်ချီသုံးပြီး ပြန်ထိန်းချုပ်နိုင်ဖို့ ထိုးစစ်ဆင်ခဲ့တာပါ။ ချင်းပြည်နယ်တောင်ပိုင်းထိုးစစ်မတိုင်ခင် စစ်တပ်က ချင်းပြည်နယ် မြောက်ပိုင်းက ဖလမ်း မြို့အပါအဝင်ဆုံးရှုံးထားတဲ့ နယ်မြေအချို့ကို စစ်တပ်က တန်ပြန်ထိုးစစ်ဆင်ပြီး ၂၀၂၆ နှစ်ဆန်းပိုင်းမှာပြန်လည်ထိန်းချုပ်နိူင်ခဲ့ပါတယ် ။အဲဒီနောက် ချင်းပြည်နယ်တောင်ပိုင်းကိုထိုးစစ်ဆင်ခဲ့တာပါ။ စစ်တပ်က မကွေးတိုင်း ယောဒေသ၊ ဆောဒေသမှာ အင်အားထောင်ချီစုဖွဲ့ပြီး မေလ ၁၆ရက်နေ့မှာ ချင်းပြည်နယ် ကန်ပက်လက်မြို့နယ်ဘက်ကို ထိုးစစ်ဆင်ခဲ့တာပါ ။ မေလကုန်ပိုင်းမှာတော့ စစ်တပ်ဟာ ကန်ပက်လက်ကိုသာမက မင်းတပ်မြို့နယ်ကိုပါ ထိုးစစ်ဆင်လာပါတယ်။မင်းတပ်က စစ်ကြောင်းတလျှောက်က ရွာအချို့ကို မီးရှို့ပြီး စစ်ကြောင်းထိုးတာပါ။ ထောင်နဲ့ ချီတဲ့ စစ်တပ်စစ်ကြောင်းမှာ စစ်မှုမထမ်းမနေရ ဥပဒေနဲ့ စုထားတဲ့ ၊ပေါ်တာဆွဲထားတဲ့ စစ်သားသစ်တွေအများစုပါဝင်ပါတယ် ။ ထိုးစစ်အစနေ့ရက်တွေမှာ စစ်ကောင်စီတပ်ဟာ ကန်ပက်လက်ဒေသအချို့ ထိုးဖောက်နိုင်ပေမဲ့ နောက်ပိုင်းမှာ ချင်းတော်လှန်ရေးတပ်တွေရဲ့ ခုခံမှုကြောင့် ရှေ့မတိုးနိုင်ဘဲ ထိုးစစ်တန့်သွားတဲ့ အခြေအနေဖြစ်ပါတယ်။ မင်းတပ်နဲ့ ကန်ပက်လက်ကို ချင်းညီနောင်အဖွဲ့ဝင် ချင်းဒေသကာကွယ်ရေးတပ်(CDF) တွေနဲ့ အာရက္ခတပ်တော်(AA)၊ အခြား မဟာမိတ်တော်လှန်ရေးတပ်တွေ ပူးပေါင်းပြီး ၂၀၂၄ ဒီဇင်ဘာမှာ သိမ်းပိုက်ထားတာပါ။ လက်ရှိမှတော့ ဒေသတွင်း ကာကွယ်ရေးတပ်တွေ ဖြစ်တဲ့ CDF မင်းတပ်၊ ကန်ပက်လက်၊ မတူပီ၊ ဒိုင်ရ် စတဲ့ ချင်းတပ်တွေပေါင်းစည်းထားတဲ့ချင်းပြည်သူ့အစည်းအရုံး (CPU/CPA)က အဲဒီဒေသကို ထိန်းချုပ်ထားပါတယ်။ ချင်းတပ်ဖွဲ့အနေနဲ့ စစ်တပ်ထိုးစစ်ခုခံရာမှာ စစ်ရေးသတင်းတွေ မထုတ်ပြန်ဘဲ ခြေသံလုံခဲ့ပေမဲ့ စစ်တပ်ဟာ ဇွန်လ တလလုံးနီးပါး မင်းတပ်နဲ့ ကန်ပက်လက်ကို လေကြောင်းဗုံးကြဲတိုက်ခိုက်မှုတွေ အဆက်မပြတ်လုပ်ဆောင်ခဲ့တာကြောင့် စစ်တပ်ဟာ ချင်းတောင်ပိုင်းတိုက်ပွဲမှာ အထိနာနေပြီဆိုတာခန့်မှန်းနိုင်ပါတယ်။ မင်းတပ်မြို့နယ် နေရာအနှံ့မှာ တိုက်ပွဲဖြစ်နေသလို စစ်တပ်ကလည်း မြို့အရှေ့ခြမ်း၊ မြို့ပေါ်၊ မြို့အနီးဝန်းကျင်ကို လေကြောင်းဗုံးကြဲတာတွေ ဆက်တိုက်လုပ်ဆောင်ခဲ့ပါတယ်။ တိုက်လေယာဉ် နဲ့ Y12 လေယာဉ်တွေ သုံးပြီးဗုံးအလုံးရေများစွာကို အကြိမ်ပေါင်းများစွာ ကြဲချတိုက်ခိုက်ခဲ့တာဟာ စစ်တပ် အနေနဲ့ချင်းတောင်ပိုင်း ထိုးစစ်မှာ အကြပ်အတည်းကြုံနေရတာကိုခန့်မှန်းနိုင်ပါတယ်။ ဇူလိုင် ၂ ရက်မှာတော့ ချင်းပြည်သူအစည်းအရုံးက ချင်းတောင်ပိုင်း စစ်ရေးအခြေအနေတစွန်းတစ ထုတ်ပြန်ခဲ့ပါတယ်။အင်အားနှစ်ထောင်လောက်သုံးပြီး ချင်းတောင်ပိုင်းကို ထိုးစစ်ဆင်လာတဲ့ စစ်တပ်ကို ဖွဲ့စည်းပုံပျက်တဲ့အထိ တပ်လန်ကျအောင် တိုက်နိုင်ထားနိုင်တယ်လို့ချင်းပြည်သူ့အစည်းအရုံးက အသိပေးလာတာပါ။ လက်နက်မျိုးစုံ ၅၀လက်ထက်မနည်း၊ ခဲယမ်းကျည်နဲ့ စစ်အသုံးအဆောင်များစွာ သုံးရခဲ့သလို စစ်မြေပြင်မှာ ကျန်ခဲ့တဲ့ စစ်ကောင်စီရဲ့ အလောင်းတွေ၊ စစ်သုံ့ပမ်းတွေကိုလည်း ပြသခဲ့ပါတယ်။ စစ်တပ်ထိုးစစ်ကိုချင်းပြည်သူ့အစည်းအရုံး(CPU/CPA)နဲ့ ယောဒေသ တော်လှန်ရေးတပ်တွေဖြစ်တဲ့ YDF၊ YAနဲ့ မဟာမိတ်တွေ အတူပူးပေါင်းပြီး စည်းလုံးညီညွတ်စွာနဲ့ခုခံစစ် ဆင်နွှဲခဲ့ရာ တိုက်ပွဲတလကျော်ကြာတဲ့အထိ စစ်ရေး အသာစီးနဲ့ တိုက်ပွဲ ဝင်နိုင်ခဲ့တယ်လို့လည်း ပြောပါတယ်။ ချင်းပြည်သူ့အစည်းအရုံးရဲ့ ထုတ်ပြန်ချက်မှာ အာရက္ခတပ်တော်(AA) ရဲ့ အမည်ကို ဖော်ပြမထားပေမယ့် ချင်းတောင်ပိုင်း တိုက်ပွဲမှာ စစ်တပ်ကို အထိနာအောင် တိုက်ခိုက်ထားနိုင်တဲ့ AA လည်း ပါဝင်ပါတယ်။မင်းတပ်အပါအဝင် ချင်းတောင်ပိုင်းမြို့သိမ်း စစ်ဆင်ရေးတွေမှာ မဟာမိတ်တွေနဲ့အတူ ပါဝင်ခဲ့တဲ့ AA အနေနဲ့ စစ်တပ်ရဲ့ တန်ပြန်ထိုးစစ်ကိုခုခံရာမှာလည်း မဟာမိတ်တွေနဲ့အတူ တိုက်ပွဲဝင်နေတာ အသိပေးထားပါတယ်။အာဏာသိမ်းစစ်တပ်ဟာ AAနဲ့ ဆုံရတဲ့ စစ်မျက်နှာတိုင်းမှာ အရှုံးကို ရင်ဆိုင်နေရတာ လည်းဖြစ်ပါတယ်။ စစ်တပ်က ချင်းတောင်ထိုးစစ် တပ်လန်ကျတဲ့အပေါ်အရှက်ရခဲ့တာကြောင့် မင်းတပ်မြို့နယ်ကို စစ်ကြောင်းပြန်ထိုးဖို့ လုပ်နေပြန်ပါတယ် ။ ဒီတစ်ကြိမ်စစ်တပ်ရဲ့ ချင်းတောင်ထိုးစစ်ကို တော်လှန်ရေးအဖွဲ့ ဘယ်လိုရိုက်ချိုးမလဲ ဆိုတာ မြင်တွေရဖို့ရှိနေပါတယ် ။ အလားတူဘယ်ဒေသတွေမှာ စစ်တပ်စစ်ကြောင်းစစ်ကျွံပြီး အထိနာတယ် ဆိုတဲ့သတင်းတွေ တပ်ချုပ်သစ် ရဲဝင်းဦးလက်ထက် ခပ်စိပ်စိပ်မြင်တွေနေရပြီ ဖြစ်ပါတယ် ။ ။ 𝗣𝗲𝗼𝗽𝗹𝗲'𝘀 𝗦𝗽𝗿𝗶𝗻𝗴 #ludunwayoo #လူထုနွေဦး #PS #People*sSpring #myanmar #NewsMedia #media #politics #international #trending #new #update #info #newsfeed #dailynews #newsupdate #breakingnews #myanmarnews #updatenews #PSA #ချင်းပြည်နယ် #ချင်းတောင် #နွေဦးတော်လှန်ရေး #ချင်းပြည်သူ့အစည်းအရုံး #ချင်းပြည်သူ့တပ်မတော် #တော်လှန်ရေးအဖွဲ့ #မြန်မာ #ChinState #SpringRevolutionMyanmar #WhatsHappeningInMyanmar #MyanmarResistance #ChinPeoplesArmy #CPA #CPU