【18區搵食-嚟葵芳唔去葵廣搵食之大熱天時34度高溫都要食佢？！】唔係醉雞唔係醉蝦係醉牛｜鮮甜魚湯配醉鮮牛肉泡飯｜重量級茶記吉列魚柳｜魚柳多到望唔到飯｜街坊最愛外賣店｜室外超高溫熱到暈都要食佢

【18區搵食-嚟葵芳唔去葵廣搵食之大熱天時34度高溫都要食佢？！】唔係醉雞唔係醉蝦係醉牛｜鮮甜魚湯配醉鮮牛肉泡飯｜重量級茶記吉列魚柳｜魚柳多到望唔到飯｜街坊最愛外賣店｜室外超高溫熱到暈都要食佢｜皮嫩肉滑海南雞｜開喺屋邨嘅cafe｜秘製流心蛋治唔食個餡都要食晒個包！ 前前後後嚟過葵芳咁多次，今次終於正式嚟葵芳搵食！眾所週知，葵廣最多嘢食，不過今次特登反其道而行，唔去葵廣搵食，而係轉戰葵芳嘅其他地方，一樣美食多籮籮～ 第一間醉鮮靚湯特色粉麵，同事力推，呢間嘅醉嘢同泡飯好好味，一場嚟到梗係要試吓啦～平時食醉嘢都係醉雞、醉蝦多，呢度居然有醉牛肉！湯底有豬骨湯同魚湯揀，揀咗魚湯，第一啖係好清好鮮甜，再食一塊醉牛，兩者好夾，魚湯嘅清甜可以中和醉牛肉嘅濃味道，認真出色！ 第二間銀河美食屋，係網上面睇到啲相已經滿心期待，雖然好多人嚟到都係食吉列豬扒，但其實魚柳仲正！面頭有6大嚿吉列魚柳，份量多到遮住晒下面啲飯，揀咗粟米汁，側邊仲會有一大pat沙律醬。魚柳炸到好酥脆，食完唔會話好油膩，記得要蘸沙律醬～ 第三間海南雞叔叔外賣店，平日好多街坊幫襯。就係佢，令到我喺室外34度嘅高溫，都要捱住熱都要食佢！不過真係幾好味，雞肉皮嫩肉滑，雞皮爽彈，油飯好香，撈埋秘製醬汁一齊食仲正～另外檸檬葉香茅炸雞翼都好抵食，賣相一啲都唔hea，有埋檸檬葉同辣椒仔做配菜，雞翼炸到脆卜卜，新鮮熱辣食仲好juicy～ 最後一間ROSIE，估唔到係屋邨入面會有間cafe，人流旺，有唔少食客係出面排隊@@認真犀利～叫咗秘製流心蛋治，佢個多士完全係今日VIP！吐司十級酥脆＋重牛油香味，配埋流心蛋味道更加一絕！Bluebottle jellyfish打卡一流，加咗蝶豆花同掛邊嘅煉奶，易入口，唔會太苦～ 醉鮮靚湯特色粉麵 地址：葵芳禮芳街17號葵福大廈側 醉鮮牛肉泡飯 $55 熱香檸薏米蜜 $6 銀河美食屋 地址：葵芳美芳街昌鴻大廈8號鋪 吉列石斑飯 $46 （粟米汁） 海南雞叔叔 (葵涌) 地址：葵涌盛芳街17-19號京寶大廈地下B1B號鋪 海南雞飯送椰子雞湯 $48 (限時優惠 ) 檸檬葉香茅炸雞翼 $28 ROSIE 地址：葵芳興芳路177號葵芳廣場地下18號鋪 秘製流心蛋治 $48 Bluebottle jellyfish $56 主持、撰文：Yvonne Lam 攝影、剪接：Doris Wong 美術：Anita Lam 延伸閱讀： 【18區搵食-牛頭角都有精緻日餐＋$138一件蛋糕？】    • 【18區搵食-牛頭角都有精緻日餐＋$138一件蛋糕？】長期俾小巴遮住嘅川菜店｜酸辣粉...   【18區搵食-去荃灣唔食米線食車仔麵？！】    • 【18區搵食-去荃灣唔食米線食車仔麵？！】去香車街市唔食老闆娘雲南米線｜肥媽屋撈麵｜...   【18區搵食-初遊佐敦之仙跡岩「真係咁伏」？】    • 【18區搵食-初遊佐敦之仙跡岩「真係咁伏」？】八零九零集體回憶｜全港第一間珍珠奶茶｜...