WAZIRI RAHMA ASITISHA UJENZI KATIKA ENEO LENYE MGOGORO KIZIMKAZI

Waziri wa Ardhi, Maendeleo ya Makazi, Mhe. Rahma Kassim Ali, amesimamisha shughuli zote za ujenzi katika eneo lenye mgogoro Kizimkazi, Mkoa wa Kusini Unguja, baada ya kubainika kuwa wanaodaiwa kumiliki eneo hilo hawajakidhi vigezo halali vya umiliki wa ardhi. Akizungumza katika eneo hilo, Mhe. Rahma amesema shughuli zote za ujenzi zitasimamishwa hadi Kamisheni ya Ardhi Zanzibar itakapokamilisha uchunguzi na kutoa uamuzi kuhusu matumizi halali ya eneo hilo. Kwa upande wake, Katibu wa Wizara ya Ardhi, Maendeleo ya Makazi, Mussa Kombo Bakari, amewataka wananchi kuzingatia sheria, kanuni na taratibu za umiliki wa ardhi ili kuepusha migogoro inayoweza kujitokeza. Naye Mkuu wa Wilaya ya Kusini Unguja, Mhe. Othman Ali Maulid, amesema maagizo ya kusimamisha shughuli za ujenzi yataendelea kutekelezwa kikamilifu hadi uchunguzi utakapokamilika. Kwa upande wake, mmoja wa wanaodaiwa kumiliki eneo hilo, Ndg. Yussuf Idrissa Mudu, amesema ameliachia suala hilo mikononi mwa Serikali ili uchunguzi ufanyike na haki itendeke kwa mujibu wa sheria. #Zanzibar #Ardhi #Kizimkazi #MaendeleoYaMakazi #RahmaKassimAli #KamisheniYaArdhi #AsamOnlineTV #TrendingNow