MFUMKO WA BEI ZANZIBAR WAPANDA KUTOKA ASILIMIA 4.09 HADI 6.01 MWEZI JUNI 2026

Mfumko wa bei Zanzibar kwa kipindi cha miezi 12 hadi kufikia mwezi Juni 2026 umeongezeka na kufikia asilimia 6.01, kutoka asilimia 4.09 zilizorekodiwa mwezi Juni 2025. Aidha, kiwango hicho kimeongezeka kutoka asilimia 5.52 zilizorekodiwa mwezi Mei 2026. Kwa mujibu wa taarifa hiyo, mfumko wa bei wa kundi la chakula na vinywaji visivyo na kileo umefikia asilimia 10.29 mwezi Juni 2026, ikilinganishwa na asilimia 4.97 mwezi Juni 2025. Faharisi ya bei kwa ujumla nayo imeongezeka kutoka 116.65 hadi 123.67 katika kipindi hicho. Ripoti hiyo imebainisha kuwa bidhaa zilizochangia zaidi ongezeko la mfumko wa bei ni pamoja na mchele wa Mbeya, unga wa sembe, samaki, ndizi, sukari, gesi ya kupikia, mafuta ya taa, dizeli na petroli, ambazo zimeonyesha ongezeko la bei katika kipindi hicho. Aidha, mfumko wa bei wa bidhaa zisizo za chakula umepungua na kufikia asilimia 2.49 mwezi Juni 2026 kutoka asilimia 3.87 mwezi Juni 2025, ingawa faharisi ya bei za bidhaa hizo imeendelea kuongezeka. Kwa upande wa mfumko wa bei wa mwezi, Juni 2026 umerekodi ongezeko la asilimia 0.96, kutoka asilimia 0.41 mwezi Mei 2026, huku ongezeko hilo likichangiwa zaidi na kupanda kwa bei za bidhaa muhimu za chakula, nishati na mafuta. #Zanzibar #MfumkoWaBei #Uchumi #BeiZaBidhaa #Juni2026 #AsamOnlineTV #TrendingNow