UBUNIFU WA TEKNOLOJIA ZA VETA WAVUTA HISIA ZA WENGI SABASABA 2026

Mamlaka ya Elimu na Mafunzo ya Ufundi Stadi (VETA) imeendelea kuvutia maelfu ya wananchi wanaotembelea Maonesho ya 50 ya Biashara ya Kimataifa ya Dar es Salaam (Sabasaba 2026), kupitia ubunifu wa teknolojia mbalimbali unaoonesha uwezo wa vijana wa Kitanzania katika kutatua changamoto za kijamii na kiuchumi. Katika banda la VETA, wageni wamepata fursa ya kujionea bunifu zinazotengenezwa na wakufunzi na wanafunzi wa vyuo vya VETA, zikiwemo mashine, vifaa vya kisasa na teknolojia zinazowezesha kuongeza tija katika sekta za viwanda, kilimo, nishati na huduma. Mbali na kuonesha ubunifu huo, VETA imekuwa ikitoa elimu kuhusu fursa za mafunzo ya ufundi stadi, kozi mbalimbali zinazotolewa pamoja na mchango wa elimu ya ufundi katika kuzalisha wataalamu wenye ujuzi unaohitajika katika soko la ajira na kujiajiri. Maonesho ya Sabasaba 2026 yameendelea kuwa jukwaa muhimu kwa taasisi za umma na sekta binafsi kuonesha bidhaa, huduma na ubunifu unaochochea maendeleo ya uchumi wa Tanzania.