ಭಾವಗೀತೆ -- ಬಾಲ್ಯ --  ಸ್ವಾಮಿದೇವನೆ ಲೋಕಪಾಲನೆ, ಶಾಲೆಯಲ್ಲಿ ಪ್ರಾರ್ಥಿಸಿದ ನೆನಪು,

-- ಬಾಲ್ಯ --   ಸ್ವಾಮಿದೇವನೆ ಲೋಕಪಾಲನೆ, ಶಾಲೆಯಲ್ಲಿ ಪ್ರಾರ್ಥಿಸಿದ ನೆನಪು, ರಾಷ್ಟ್ರಧ್ವಜ ಹಿಡಿದು ಹೆಮ್ಮೆಯಲಿ, ಪ್ರಭಾತ್ ಭೇರಿಯಲಿ ನಡೆದ ನೆನಪು//   ಗೌರಿ ಕೆಚ್ಚಲಿನ ನೊರೆ ಹಾಲು, ಕಡಗೋಲಿನಿಂದ ಕಡೆದು ತೆಗೆದ ಬೆಣ್ಣೆ, ಕೋಡ್ಲೊಲೆಯಲ್ಲಿ ಸುಟ್ಟ ಅಕ್ಕಿ ಹಪ್ಪಳ, ಯಾತದಲಿ ಕುಟ್ಟಿದ ಅವಲಕ್ಕಿ ನೆನಪು//   ಅಜ್ಜ ಅಜ್ಜಿಗೆ ನಾವೆಲ್ಲ ಅಚ್ಚುಮೆಚ್ಚು, ಅತ್ತೆ ಮಾಡಿದ ಕುಸುರೆಳ್ಳು ಸಕ್ಕರೆ ಅಚ್ಚು, ದೊಡ್ಡಮ್ಮ ಕೊಟ್ಟ ಉಂಡೆ ಚಕ್ಕಲಿ ತಂಬಿಟ್ಟು, ಚಿಕ್ಕಮ್ಮ ನೀಡಿದ ತೇಂಗೊಳಲು, ನಿಪ್ಪಟ್ಟು//   ಒಡಹುಟ್ಟಿದವರೊಂದಿಗೆ ಆಟವಾಡಿದ್ದು, ಸೆಗಣಿಯಲಿ ಅಂಗಳವನು ಸಾರಿಸಿದ್ದು, ಕೆಂಪು ಸಿಮೆಂಟ್ ನೆಲದಿ ರಂಗೋಲಿ ಹಾಕಿದ್ದು ಬೆಳದಿಂಗಳಲ್ಲಿ ಅಮ್ಮನ ಕೈತುತ್ತು ತಿಂದಿದ್ದು//   ಯಾವುದು ನೆನೆಯಲಿ, ಯಾವುದು ಬಿಡಲಿ, ಸವಿನೆನಪು ಸದಾ ಕಾಡುವುದು ಮನದಲಿ, ಮರಳಿ ಬಾರೆಯಾ ಎನ್ನ ಬಾಲ್ಯವೇ ಮತ್ತೆ, ಅವಿಭಕ್ತ ಕುಟುಂಬದ ಒಲವು ತಾ ಮತ್ತೆ//   ಸಾ.ನಾ. ಶ್ರೀಲಕ್ಷ್ಮಿ