ಭಾವಗೀತೆ -- ಮಲ್ಲಿಗೆ ಮಿಂಚು ಮಲ್ಲಿಗೆ ಬಳ್ಳಿ ಮೆಲ್ಲಗೆ ಹುಟ್ಟಿತ್ತು

-- ಮಿಂಚು ಮಲ್ಲಿಗೆ --   ಮಲ್ಲಿಗೆ ಮಿಂಚು ಮಲ್ಲಿಗೆ/ ಬಳ್ಳಿ ಮೆಲ್ಲಗೆ ಹುಟ್ಟಿತ್ತು/ ಹಸಿರೆಲೆ ನಡುವಲಿ/ ಮಿಂಚು ಮಲ್ಲಿಗೆ ಬೆಳ್ಳಗೆ ಅರಳಿತ್ತು// ಬನ್ನಿರಿ ನೋಡಿರಿ/ ಮಿಂಚು ಮಲ್ಲಿಗೆ ಪಡೆಯಿರಿ/ ಬನ್ನಿರಿ ಕೊಳ್ಳಿರಿ / ಮನೆಯಂಗಳದಲಿ ಬೆಳೆಸಿರಿ//   ಮಲ್ಲಿಗೆ ಮಿಂಚು ಮಲ್ಲಿಗೆ/ ತನ್ನ ಕಾಯಕ ಮಾಡಿತ್ತು/ ಪರಿಸರ ಪಾಠವ ಹೇಳುತ ಲತೆಯಲಿ/ ಕಣ್ಣಿಗೆ ಹಬ್ಬವ ತಂದಿತ್ತು/ ಅರಳುತ ಬಿರಿಯುತ/ ಪರಿಮಳ ಸೂಸುತ ನಗುತಿತ್ತು// ಮಲ್ಲಿಗೆ ಮಿಂಚು ಮಲ್ಲಿಗೆ/ ತನ್ನ ಗೆಳತಿಗೆ ಕಾದಿತ್ತು/ ಬಾಗುತ ಬಳುಕುತ ಮಲ್ಲಿಗೆ ಬಳ್ಳಿಯು/ ತರುವಿಗೆ ಸುತ್ತಿ ನಲಿದಿತ್ತು/ ಪ್ರಕೃತಿಯ ತತ್ತ್ವದಾ/ ಸಹಜೀವನವನ್ನು ತೋರಿತ್ತು// ಸಾ. ನಾ. ಶ್ರೀಲಕ್ಷ್ಮಿ