Өзбекстанды 10 жыл басқарған Шавкат Мирзиеев кім? Өзбекстан не болмақ?

Ол оппозициялық қозғалыстардан немесе революциялық топтан шыққан саясаткер емес. Керісінше, мемлекеттік басқару жүйесінің барлық негізгі сатыларынан өтіп, біртіндеп билік элитасының жоғары эшелонына көтерілді. Ол премьер-министр қызметін 13 жыл атқарып, кейін президент атанды. Айтып отрығанымыз - Өзбекстан президенті Шавкат Мирзиёев. Биыл оның мемлекет басшысы атанғанына 10 жыл толады. Осы уақыт аралығында көрші елде не атқарылды, қандай қателіктер жіберілді, нендей жетістіктер бар? Талқылаймыз. Шавкат Миромонұлы Мирзиёев 1957 жылы 24 шілдеде Өзбекстанның Жизақ облысында дүниеге келді. Ташкентте инженер-механик мамандығы бойынша білім алды. Еңбек жолын жоғары оқу орнында ғылыми қызметкер ретінде бастады. Кейін мемлекеттік басқару саласына ауысып, аудандық және облыстық деңгейдегі әкімшілік қызметтерді атқарды. 1996 жылы Мирзиёев Жизақ облысының әкімі болып тағайындалды. Арада бес жыл өткен соң Самарқанд облысын басқаруға жіберілді. Самарқанд – Өзбекстандағы ең ықпалды өңірлердің бірі саналады. Сондықтан бұл қызмет оның саяси мансабындағы маңызды кезең болды. Дәл осы жылдары ол елдің тұңғыш президенті Ислам Каримовтың сеніміне ие болған кадрлардың қатарына енді.