Исмаил: Владата усвои закон за коцкање со недефинирана оддалеченост од 500 метри

Собранието денеска го усвои владиниот Предлог-закон за игрите на среќа, при што беа одбиени сите амандмани поднесени од пратеничката група на Левица. Во расправата, пратеникот на Левица Реџеп Исмаил оцени дека самиот назив на законот – „Закон за игрите на среќа“ – претставува еуфемизам со кој се прикрива комерцијализацијата на, како што рече, „порок што предизвикува разорни социјални последици“. „Минатата година прометот во објектите за коцкање бил близу три милијарди евра, што е фрапантна бројка и доволно говори за размерите на проблемот“, истакна Исмаил. Тој нагласи дека Левица нема да го поддржи законот, бидејќи предложените решенија, според него, не обезбедуваат вистинска заштита на младите и не ја намалуваат зависноста од коцкање. Исмаил посочи дека законот и понатаму дозволува рекламирање на игрите на среќа на спортски терени, додека ограничувањето од 500 метри од училиштата е, како што рече, непрецизно дефинирано, бидејќи не се мери по воздушна линија, туку според т.н. „најбезбеден пат“, што ќе се уредува со подзаконски акти. Според него, уште поголем проблем е што законот не предвидува максимален број објекти за коцкање во едно населено место според бројот на жители. „Со ваквото решение ќе се создадат зони, особено во Скопје, каде што ќе се концентрираат казина и обложувалници. Наместо ограничување, ќе добиеме цели квартови претворени во центри на коцкарската индустрија“, предупреди пратеникот. Левица критикуваше и што Владата не прифатила амандман со кој се барало објектите за коцкање да не работат за време на државни и верски празници, туку и понатаму ќе можат да работат 24 часа дневно, 365 дена во годината. Во своето обраќање Исмаил ја оспори и тезата на Министерството за финансии дека законот ќе ги намали негативните последици од коцкањето, оценувајќи дека Владата не понудила ниту една мерлива методологија по која ќе може да се оцени дали реформата дала резултат. „Немаме никакви индикатори – колку случаи на семејно насилство се поврзани со коцкањето, колку кражби, колку зависници, колку малолетници се вклучени. Без вакви податоци, по една година секој ќе може да тврди што сака за ефектите од законот“, рече Исмаил. Тој оцени дека Владата наместо да понуди системско решение, ќе го намали само јавниот притисок околу проблемот, без суштински да ги реши последиците од коцкањето. Дополнително, Исмаил ја критикуваше и амандманската интервенција на владејачкото мнозинство, со која хотелите што приредуваат игри на среќа беа изземени од ограничувањето за минимална оддалеченост од училиштата. „Со ова практично им се дозволува на хотелите да организираат игри на среќа и ако се на неколку метри од училиште. Не можам да разберам зошто беше направено ова исклучување“, истакна тој. На крајот, пратеникот на Левица изрази уверување дека законот нема да ги даде ветените резултати и најави дека по една година ќе бара одговорност и од Министерството за финансии и од Министерството за социјална политика за, како што рече, непостоењето на јасни показатели за социјалните последици од коцкањето.