Мециновиќ: Коцкарниците остануваат со повеќе привилегии отколку ограничувања

На денешната седница на Собранието, пратеникот од Левица, Амар Мециновиќ, образложи зошто Левица нема да го поддржи Предлог-законот за игрите на среќа, но нема ниту да гласа против него, оценувајќи дека предложените измени претставуваат чекор, но далеку од потребната регулација на коцкарската индустрија. Мециновиќ потсети дека Левица поднесе 13 амандмани за построга регулација на коцкарниците, од кои владејачкото мнозинство не прифати ниту еден. Тој посочи дека беа одбиени предлозите за проширување на забраната за рекламирање на коцкарниците, забрана на бонусите, бесплатните облози и промотивните акции, ограничување на работното време, забрана за работа за време на државни и верски празници, ограничување на бројот на казина, како и зголемување на надоместоците што коцкарниците ги плаќаат кон државата за кои истакна дека годишно во коцкарската индустрија се уплаќаат речиси три милијарди евра, додека во државниот буџет се враќаат помалку од 300 милиони евра: „Јас до ден денес не знам зошто некој би имал против да има поголеми рестрикции за рекламирање. Што има лошо во забрана на рекламирање на коцкарници на социјални мрежи, спортски, културни и образовни настани?”