山姆搵死！國家總局直接出手！麻薯活鼠、烏冬生蛆、草莓重金屬超標。極速達變臨期清貨場，中產天塌地陷！嚴選變垃圾精選，1400億帝國仲救得返嗎？#山姆 #熱門 #山姆超市 #食品安全

山姆俾國家約談！三億中產今次真系天塌地陷！ 收人兩百六蚊會費，轉頭就塞活蛆入會員個嘴度，呢啲生意真系好做咯。六月十五號，國家市場監管總局直接約談中國山姆總部，留意返，唔系乜嘢地方市監局，而系總局直接搵總部負責人照肺。呢個咩概念呢？即系等於你返學嗰陣，唔系班主任搵你傾偈，而系校長親自拖你入校長室照大鏡，呢個份量山姆你唔系唔知嚇嘛？ 由臭崩崩嘅豬肋排，到麻薯入面捐窿捐罅嘅生猛老鼠；由就嚟到期嘅蔬菜沙律，到生猛到識跳舞嘅烏冬麵蛆蟲，山姆正喺道一集又一集上演緊當代消費主義嘅黑色幽默。你畀錢買張入場券，以為自己上咗高端俱樂部，點知人哋當你系清貨尾嘅垃圾桶，仲要系自備膠袋嗰只。 市場監督管理總局一張約談令，將呢間一路衝到冇朋友嘅山姆會員店推曬去風口浪尖。約談當日呢，沃爾瑪（中國）投資有限公司即刻做工商變更，法定代表人同董事長由劉鵬接手；兩日後，揸Fit採購體系差唔多十年嘅首席採購官張青，宣布劈炮唔撈。 短短七十二個鐘頭入面，呢間舊年銷售額衝破1400億人仔嘅零售巨無霸，經歷咗入華以嚟最勁嘅人事大地震。由監管約談到高層大換血，由消費者投訴多到冧山到品控體系俾人質疑到體無完膚……山姆正經歷緊一場前所未有嘅信任黑洞。呢場危機嘅本質到底系乜？閃電換帥又系咪真系救得返啲消費者嘅心？ 講返山姆近一年嘅戰績啦，真系阿婆踩滾軸——唔服唔得啊。而家對中產嚟講，去山姆買嘢，本質上同抽盲盒完全冇分別。唯一嘅分別系，盲盒抽到隱藏版你發達，山姆抽到隱藏版你清盤。尤其系嗰個曾經令無數中產神魂顛倒嘅 山姆冷鮮區，已經變成《生化危機》嘅實景拍攝場地。 你是但打開黑貓投訴，或者碌下抖音呢啲社交平台，就等於睇緊一場「美食恐怖片」嘅精華合集。有消費者投訴，買俾細路飲嘅牛奶，細路一啖入口實時噴返出嚟。攞近鼻哥一聞呢，陣酸臭味好似核彈爆發咁直衝大腦，但包裝上面個日期竟然清清楚楚寫住「未過期」。好心山姆客服部成班人去讀下《食品安全法》啦，再唔系呢，睇下《新華字典》入面「保質期」呢三個字點解都好吖！ 如果話產品變質發臭仲可以用鼻哥預警，咁保質期入面嘅發毛食品就系純粹嘅「視覺核打擊」！今年三月到六月，短短三個月，山姆嘅短保食品區直頭變成咗黴菌嘅五星級大酒店。南瓜小麵包、黑松露鹼水貝果、亞麻籽吐司……呢啲密封到完完整整嘅食物，表面鋪滿曬綠油油、白曬曬嘅霉斑。有消費者嬲到爆咁話，「山姆你系咪想幫我培養盤尼西林呀？」 但講到以上所有嘢呢，喺「麻薯活鼠」事件面前，都只系小兒科。舊年十二月，深圳有位老友經山姆極速達買咗盆麻薯，一打開呢，嘩大佬呀，一隻生猛到識跳嘅活老鼠趴喺麻薯堆中間，四目交投，真系驚喜過中六合彩。山姆嘅回應呢？初步判斷系取貨點被周邊蟲害偶然入侵。我同大家翻譯嚇，即系話老鼠跑入去唔關我事，關個紙皮篋事，但《食品安全法》邊個同你講笑呀？邊個賣俾你，邊個孭飛，你呢啲卸膊技術，比國足射飛十二碼仲要純熟。 蛆蟲，你冇聽錯，就系蛆蟲，喺山姆烏冬麵入面開派對！就系前兩個月呢，深圳一位資深會員喺山姆福田店買咗一箱韓式泡菜烏冬麵，細路食第二啖即場嘔返出嚟，因為入面有蛆呀！山姆工作人員確認情況屬實，賠償對方一千蚊。一千蚊就搞得掂單活蛆事件？夾埋嗰兩百六會費，即系入場券加驅蟲觀賞費套餐，埋單一千二百六，都算系咁啦嚇話？ 仲有凍干士多啤梨，農殘重金屬買一送一。就系三月，山姆一款有機凍干士多啤梨俾人踢爆同315曝光嘅問題產品同源，重金屬鉻超標，仲驗出超過二十種超範圍農藥殘留，包括國家一早禁咗嘅高毒農藥克百威。山姆呢頭出檢測報告話符合國家標準，嗰頭就緊急落架，你話呢個「最嚴品控」究竟系邊度學返嚟？掩耳盜鈴進修班嘅榮譽畢業生系咪？ 椰皇呀，細路食完疴到七彩，果肉紫過中毒。就喺今個月呢，武漢袁女士喺山姆買咗盒泰國椰皇，細路食完即刻開大，開返個椰皇一睇呢，六個入面四個果肉發紫，椰水酸到似醋。業內人士鑑定系典型霉變。山姆點處理？肉眼睇嚇，鼻哥聞嚇，拒絕試食，話冇變質，就咁掟三百蚊出嚟叫退貨。三百蚊就想打發一個疴到腳仔軟嘅細路，你當系施捨畀乞兒呀？ 最抵死嘅操作嚟喇，山姆極速達，變咗臨期貨品專賣店。有消費者反映，用正價買嘅嘢，到手一睇距離過期唔夠廿四個鍾。搵客服投訴，客服回咗句激到人血壓實時爆標嘅說話：「公司制度就系咁樣上架?，如果你唔想要臨期嘅，要喺訂單入面備註唔要臨期。」嚇？我畀咗兩百六會費，仲要自己備註唔要過期嘢？拼多多賣臨期食品都識得打折標明啦，你山姆就要消費者主動講「我唔要臨期」？合者唔要臨期系特別要求，要臨期系默認設定？呢個腦迴路，我強烈建議申報非物質文化遺產。 黑貓投訴平台上面，涉及山姆嘅投訴已經超過一萬五千條。一萬五千條呀朋友們，呢個數仲多過某啲偏遠小鎮嘅常住人口啦。但搞笑嘅系，山姆依然賺到笑。二五年，山姆中國銷售額突破咗1400億，按年增長約四成，付費會員超過1070萬。一邊系社交媒體上插到飛起，一邊系營業額爆到離曬大譜，呢個講明咩？講明山姆真系將你哋啲中產心理摸到透曬。 你交咗兩百六會費，呢個系沉沒成本呀朋友們，錢都畀咗，唔用就覺得蝕底。好似你買咗張健身卡，明知自己唔會去，都硬系要擺喺銀包度安慰自己。於是就算你一邊鬧，一邊都會繼續落單。甚至有人開始自我催眠：「雖然山姆質量差咗，但出面嗰啲唔使會費嘅超市質量仲差呀！」以前山姆嘅核心競爭力叫質量嚴選，你畀年費買嘅系山姆幫你篩選過嘅精品；而家呢？收你年費，轉個頭就將極速達前置倉變成清垃圾嘅專用通道。你唔再係為優選產品埋單，你係為咗塞俾你嘅臨期菜、變質肉、甚至生猛老鼠嘅渠道費埋單呀！ 仲諷刺嘅系，山姆入華之前二十年先開得十間鋪，舊年一年就開咗十間，今年計劃全年新開十三間，開得快過印銀紙啊。品控呢？根據媒體報導，供應商審核周期由九十日壓縮到四十五日。以前推個新產品要花大量時間去睇供應鏈，而家巴不得今日簽約聽日上架。嗰班高管會唔知快速擴張會出問題咩？佢哋太清楚啦！但佢哋更加清楚另一樣嘢：喺資本市場入面，規模比利潤更值錢，門店數量比任何質量報告都更加好講故仔。至於消費者體驗插水？遲啲先算啦。 山姆嘅回應次次都好快：完全認可、深刻反思、誠懇道歉、成立專項整改組……呢套稿我差唔多識背啦，每次出事都系呢堆詞，好似複製貼上咁，虛心接受，死都唔改，第次再犯。互聯網大廠嗰套公關技倆，山姆學得鬼咁精。 監管總局今次約談呢，本質上就系最後通牒。俾曬機會你，話你知個窗口期有幾耐，改唔改你自己諗。過咗呢個機會，你仲系原地踏步嘅話，國家隊就唔會同你客氣。嗱，山姆你最好諗清楚喇，你嘅會員系俾錢入場，唔系俾錢入廠啊。再系咁落去，唔止中產會走佬，連你嗰1400億生意額，都會變成人哋嘅反面教材。你最好同我醒醒定定，唔好再將「會員制」變成「黴菌制」，將「質量嚴選」變成「垃圾精選」喇！