RC KUNENGE AITAKA KIBAHA KUBUNI VYANZO VIPYA VYA MAPATO

Mkuu wa Mkoa wa Pwani, Mhe. Abubakar Kunenge, ameielekeza Halmashauri ya Wilaya ya Kibaha kuendelea kubuni vyanzo vipya vya mapato ili kuongeza ukusanyaji wa mapato ya ndani na kuimarisha maendeleo ya wananchi. Ametoa maelekezo hayo wakati wa Baraza Maalumu la Madiwani la kujadili Taarifa ya CAG kwa mwaka wa fedha 2024/2025. Mhe. Kunenge amepongeza halmashauri hiyo kwa kuvuka shilingi bilioni 12 za mapato ya ndani, lakini akasisitiza umuhimu wa kuendelea kutafuta fursa mpya za mapato badala ya kutegemea vyanzo vya kawaida pekee. Pia amesisitiza kuwa hati safi iende sambamba na utekelezaji wa miradi yenye tija na matokeo chanya kwa wananchi. Aidha, amewataka madiwani kushirikiana na watendaji katika kutatua migogoro na kero za wananchi ili kuharakisha maendeleo ya Wilaya ya Kibaha. Naye Katibu Tawala wa Mkoa wa Pwani, Pili Mnyema, ameipongeza halmashauri hiyo kwa mafanikio ya ukusanyaji wa mapato huku akihimiza kuendelea kuimarisha utendaji wake.