Conservación do patrimonio cultural e natural e limitación do uso turístico do territorio. 06-05-26

Encontros Temáticos Transversais dende o Patrimonio Cultural O Territorio. Conservación do patrimonio cultural e natural e limitación do uso turístico do territorio ETTPC5. 5 e 6 de maio de 2026 Santiago de Compostela Neste quinto encontro temático transversal do bienio 2025-2026 trataremos do territorio dende a súa consideración como recurso turístico. O patrimonio natural, paisaxístico e cultural, tanto tanxible como intanxible, que se dan a man no territorio, percíbese como un elemento que contribúe ao desenvolvemento económico e social das comunidades e á xeración de riqueza e emprego nos lugares onde se localiza. Como sinalou o Foro Patrimonio e Sociedade do CCG, cómpre preguntarse se na xestión turística do territorio interesa estar na liña dun uso baleiro de contido e valores, moi probablemente perecedoiro, ou se interesa ofertar un produto conectado coa realidade cultural e patrimonial galega, rigoroso e atractivo que nos represente como cultura e se manteña no longo prazo. A preservación da identidade cultural do territorio require seguir construíndo paisaxe como expresión da memoria, salvagardando a herdanza, garantindo a continuidade das actividades que soporta e que o conceptualiza como paisaxe cultural, incompatible cun monocultivo turístico. Na actualidade, acumúlanse evidencias de que o uso turístico masificado do noso patrimonio cultural e natural está provocando danos na propia autenticidade e integridade deses bens. Dende os Camiños de Santiago até a praia das Catedrais, pasando pola cidade histórica de Compostela ou os patrimonios inmateriais, o uso turístico do territorio nun contexto de atracción crecente de turistas ao denominado “refuxio climático” do noroeste suscita a necesidade de que os poderes públicos galegos (autonómico e entidades locais) dispoñan de ferramentas de control dos fluxos turísticos sobre o territorio, de modo que se garanta a súa conservación para as xeracións futuras. Neste encontro trataremos de explorar até que punto e de que maneira é posible facelo. 0:34 Presentación 17:22 Mesa redonda 1:52:50 Debate co público