MAFUNZO YA CHANJO YAWAJENGEA UWEZO WAUGUZI WASAIDIZI KUBORESHA HUDUMA ZA AFYA YA JAMII MOSHI DC

Mganga Mkuu wa Wilaya ya Moshi, Dkt Juma Mombokaleo, amefungua mafunzo kwa Maafisa Wauguzi Wasaidizi kutoka zahanati, vituo vya afya na hospitali yaliyoandaliwa na Wizara ya Afya kwa lengo la kuwajengea uwezo katika utoaji wa chanjo na kuboresha huduma za afya ngazi ya jamii. Akizungumza wakati wa ufunguzi wa mafunzo hayo, Dkt Mombokaleo amesema serikali inaendelea kuimarisha sekta ya afya kupitia kuwajengea uwezo watumishi wa afya ili kuhakikisha wananchi wanapata huduma bora, salama na zenye kuzingatia viwango vya kitaalamu. “Ninawasihi mkatumie mafunzo haya kuongeza weledi, uwajibikaji na ubora wa huduma mnazozitoa kwa wananchi kwani huduma bora za chanjo ni msingi muhimu wa afya ya jamii.” Dkt Juma Mombokaleo “Serikali kupitia Wizara ya Afya itaendelea kuweka mkazo katika kuwajengea uwezo watumishi wa afya ili kuimarisha huduma za kinga na tiba kuanzia ngazi ya jamii.” Dkt Juma Mombokaleo “Mafunzo haya yametupa maarifa mapya yatakayotusaidia kutoa huduma za chanjo kwa ufanisi zaidi pamoja na kuwafikia wananchi wengi kwa elimu ya afya.” Fredrick Elisante, Afisa Muuguzi Msaidizi “Tunaamini elimu tuliyoipata itaongeza ubora wa huduma katika vituo vyetu vya kutolea huduma na kusaidia kupunguza changamoto zinazoweza kujitokeza kwenye utoaji wa chanjo.” Dorica Nkemba, Afisa Muuguzi Msaidizi Mafunzo hayo yanatarajiwa kuwasaidia washiriki kuongeza ufanisi katika utoaji wa chanjo, usimamizi wa huduma za afya ya jamii pamoja na kuendelea kutoa elimu kwa wananchi kuhusu umuhimu wa chanjo katika kinga dhidi ya magonjwa mbalimbali.