Gatotkaca Mangkat Birahi (Video & Audio Live) - H. Asep Sunandar Sunarya GH3

Pagelaran wayang golék Giriharja 3 pingpinan Ki Dalang H. Asép Sunandar Sunarya ieu waktu ngagejrak di Kampung Papak Serang Desa Serang Mekar, Kec. Ciparay Kab. Bandung taun 2010. Nu gaduh hajatna Bapa Dirja salah saurang nayaga Giriharja 3. Mung hapunten pisan, videona seueur nu kapotong margi VCD na tos aus. Kukituna supados cariosna nyambung, disambung ku audio tina pagelaran Giriharja 3 di tempas sanés nu judul lalakonna sami. Kitu deui audio aslina na campur sareng sora nu nongton, sesah dipisahkeunana sareng sora dalang atawa gamelan. Mung tiasa diedit sakedik robah teu pati ngaguruh teuing dina Adobe Audition. Sinopsis : Sinigeug, di padépokan Andung Kancana, Mahawiku Manikhara keur dideuheusan ku putuna putri sakembaran nyaéta Éndang Pergiwa jeung Éndang Pergiwati. Dua putri téh ménta ijin ka éyangna hayang nepungan bapana nyaéta Adipati Arjuna ti Madukara, panengah Pandawa. Éyangna gé ngabéjaan yén duanana boga lanceuk lalaki béda indung nyaéta Abimanyu, budakna Déwi Subadra, bojona Arjuna nu kahiji. Baheula waktu Arjuna ngalap élmu di padépokan pernah katarik ati kapentang asmara ka putri wiku nu ngaranna Déwi Manohara. Nya antukna dikawinkeun. Ngan Arjuna teu lila di padépokan da terus mulang ka Madukara. Waktu ditinggalkeun ku Arjuna, Déwi Manohara keur ngandeg atawa keur ngandung. Tapi waktu ngalahirkeun, Déwi Manohara maot. Dua putri éta diurus ku éyangna, tur diasuh ku Lurah Catrik nu katelah Mang Uyun. Malah waktu Pergiwa Pergiwati rék nepungan bapana, dianteur ku pangasuhna téa. Di satengahing perjalanan, di tengah leuweung, tiluanana papanggih jeung rombongan ti Astina nu dipimpin ku Resi Dorna atawa Kombayana. Maranéhna meunang pancén ti Prabu Suyudana supaya néangan putri sakembaran keur pangaping pangantén putrina Batara Kresna, nyaéta Putri Sondari nu dipikahayang ku budakna Prabu Suyudana. Carios lengkepna mangga bandungan dugi ka réngsé. Mudah-mudahan pintonan wayang golék ieu janten pieunteungeun ka urang sadayana, teu sakadar hiburan tapi malah mandar tongtonan jadi tungtunan, gogonjakan ulah jadi éjékan anggursi jadi ajakan demi kokohna persatuan jeung kesatuan bangsa. Teu hilap ka nu teu acan subscribe channel pribados nu énggal ieu mangga subscribe sareng pencét loncéngna supados uninga pami aya aplodan énggal. Salajengna urang sadayana kintun du’a ka almarhum Pa H. Asep Sunandar Sunarya, mugia almarhum ditampi iman islamna, dihapunten dosa-dosana, dicaangkeun di alam kuburna, dipaparinan tempat anu mulya mungguhing Allah Swt,. Aamiin Ya Robbal Alamin. Wassalamualaikum Wr. Wb.