Berisha miting në Patos dhe Rrogozhinë, “Në mandatin e dytë, Shqipëria Europiane” - (7 Qershor 2009)

Lajme arkiva 2009 Nga qyteti i Patosit kryeministri Berisha ka ndarë me banorët e kësaj zone projektin e “Shqipërisë Europiane” gjatë hapjes së fushatës elektorale. Për shefin e ekzekutivit shndërrimi i Shqipërisë në kantier ndërtimi dhe anëtarësimi në NATO janë dëshmi e ndryshimeve që ka bërë e djathta në këto katër vite qeverisje. Dhe për të vazhduar më tej projektin e kësaj ëndrre të nisur tha kryeministri Berisha, në mandatin e ardhshëm do t’u japim mundësinë qytetarëve të Patosit që të kenë një infrastrukturë europiane, ashtu sikundër do të bëjmë të mundur dhe lëvizjen e lirë në Bashkimin Evropian. Sali Berisha: “Qytetar shqiptar, të Patosit evropian dhe Shqipërisë evropiane do të thotë para së gjithash, së pari të lëvizni të lirë në mbarë Evropën, së dyti të lëvizni në vendin tuaj me rrugët më moderne, më të shkurtra. Do të asfaltojmë çdo rrugë të këtij qyteti.” Për shefin e qeverise punësimi do të jetë një nga prioritetet e mandatit të dytë. Duke premtuar se ashtu si në këto katër vite rritja e rrogave dhe pensioneve do të shoqërohet me një reformë fiskale në favor të biznesit dhe tregut të lirë, Berisha tha se një vëmendje e veçantë do t’i kushtohet fshatit si dhe industrisë së naftës. Sali Berisha: “ Ndaj dhe punësimi është dhe do mbetet përparësia ime absolute, ne kemi firmosur mbi 5.6 miliard marrëveshje koncensionare dhe në 4 vitet që vijnë ne do të punësojmë së paku 160 mijë shqiptarë. Unë ju jap fjalën ju se sa të jem në pushtet, ju do të keni rritje më të madhe rrogash se çdo vend tjetër në Lindjen e Evropës. Industria e naftës, industria e perspektivës së këtij vendi, por qeveria ime një vëmendje shumë të madhe do t’i kushtojë fshatit shqiptar, fermerëve të Patosit dhe të Myzeqesë ju premtoj se qeveria ime do financojë çdo projekt të tyre për nxitje prodhimi.” Nga Patosi kryeministri nuk ka nguruar t’i bëjë thirrje kryetarit socialist Edi Rama që të bëhet pjesë e garës elektorale, duke u shprehur i gatshëm të bëjë çdo ndryshim ligjor për të mundësuar pjesëmarrjen e tij në listën e kandidatëve për deputetë të selisë rozë. Sali Berisha: “Dua t’i them dhe një herë të jap 4 ditë afat, të mbledhim parlamentin, të ndryshojmë ligjet, dil në krye të listës. Dil se burri duhet të ketë kurajo të shohë drejt në sy si fitoren edhe humbjen. Çfarë do mësosh ti, fundin tënd politik ... të tjerat i ke të garantuara. Dil tani, shqiptar je dhe ti, dil në shesh edhe vazhdojmë betejën.” Duke garantuar se zgjedhjet e 28 qershorit do të jenë një ditë e madhe për të gjithë shqiptarët, kryeministri ftoi qytetarët të tërheqin kartat e identitetit, për të prekur sipas tij ndryshimin që i afron ata me qytetarët europianë.” …...... Biznesi, Berisha: Do të heqim taksat për 5 vjet Turi elektoral i kryeministrit Berisha ka vijuar dhe ne qytetin e Rrogozhinës, nga ku ka premtuar heqjen e taksave për bizneset për një periudhë 5 vjeçare. Sipas shefit të qeverisë “Shqipëria në Punë” do të jetë motoja që do të shoqërojë të djathtën në mandatin e saj të dytë, ku një prioritet të veçantë do të kenë investimet në infrastrukturë.../tvklan.al Gazetare: Jolldiz Mitro SUBSCRIBE to “RTV KLAN” on YouTube for more videos! Për më shumë informacione vizitoni faqen tonë web https://tvklan.al/ Videot e fundit nga Tv Klan i gjeni në faqen https://tvklan.al/video/ Follow Tvklan on Facebook:   / tvklan   Follow rtvklan on Instagram:   / rtvklan   Programet e Tv Klan mund t’i ndiqni edhe në faqen https://tvklan.al/programe/