Ep 77 | මේ යුද්ධයේ අවසානය අලුත් ඉතිහාසයක ආරම්භයයි.

දෙවැනි ලෝක යුද්ධයේ මතකයන් යළි අලුත් කර ගැනීමට මිනිස් වර්ගයාට සිදුවී ඇත. සමහරවිට ඉන් ඔබ්බට යන අත්දැකීම් ද නිර්මාණය කෙරෙමින් තිබේ. තත්ත්වය වඩාත් බිහිසුණු වන්නේ, මෙය පාර්ශව කරුවන් හා නිරීක්ෂකයන් මිස මැදිහත්කරුවන් නැති යුද්ධයක් බවට පත්ව ඇති බැවිණි . මෙතෙක් ආගමික හා සංස්කෘතික මූලධර්මවාදය ගොඩනැගුණු යුද ගැටුම් වෙනුවට අද අත්විඳින්නට සිදුව ඇත්තේ ඩොලරය හා පෙට්‍රෝලියම් මත ගොඩනැගුණු මූලධර්මවාදී යුද්ධයකට බව එක් මතයකි.ඒ අතරම නූතනත්වයේ පරමාදර්ශයන් අහෝසි කරමින් මේ වන විට එතෙක් මෙතෙක් ගොඩනැගුණු ආචාර ධාර්මික එකඟතාද අතාර්කිකව යමින් තිබේ.නොබැඳි ජාතීන්ගේ භූමිකාව අහෝසිව ගොස් ඇති අතර එක්සත් ජාතීන්ගේ සංවිධානය හෝ වෙනත් වගකිවයුතු මැදිහත්කරුවන්ගේ භූමිකාවක්ද පෙනෙන තෙක් මානයේ ක්‍රියාත්මකව නැත. මෙවැනි පසුබිමක ඊශ්‍රායලය හා ඇමරිකන් කඳවුරු ඒකාබද්ධව ඉරානයට එල්ල කරමින් සිටින යුද මෙහෙයුමෙහි අවසානය කුමක් විය හැකිද යන ප්‍රශ්නය දැන් මතු වෙමින් තිබේ. ඒ ලැබෙන ප්‍රතිඵලය කුමක් වුවද මේ යුද ගැටුමෙහි අවසානය වෙනත් ලෝකයක ආරම්භය විය හැකි බවට ලකුණු දැනටමත් පහළ වෙමින් ඇත.ඊට හේතුව දැනටමත් සිදුව ඇති මහා පරිමාණයේ යුධ මෙහෙයුම් හේතුවෙන් යුද්ධයට සම්බන්ධ සියලු පාර්ශව ඔරොත්තු දිය නොහැකි මට්ටමේ අර්බුදයකට පත්ව ඇති බැවිණි. එවැනි සන්දර්භයක යුද්ධය අතර හෝ යුද්ධයෙන් පසුව හෝ ගොඩනැගෙන ලෝකයෙහි දේශපාලන හා ආර්ථික වටපිටාව කෙසේ විය හැකිද යනු මේ වන විටත් ගොඩනැගෙමින් තිබෙන විවාදයකි.එවැනි පසුබිමක ලංකාව වැනි රටක ඉරණම කුමක් විය හැකිද යනු අනෙක් වැදගත්ම ප්‍රශ්නයයි.ඊට මුහුණ දීම සඳහා මෙවැනි රටකට ගත හැකි යම් විසඳුමක් හෝ විකල්ප ක්‍රියාමාර්ගයක් තිබේද වැනි ප්‍රශ්නද ඒ අතර මතු වෙමින් තිබේ.මෙවර Oneword කතිකාව ගොඩනැගෙන්නේ එවැනි ප්‍රශ්න මත පදනම්වය.