廣州業主真系想死！黃埔樓市大屠殺，由3.1萬直插水穿1萬關口，當年買一套今日掃三套，連底褲都輸埋嗰只！買樓變買時光機，連底褲都輸埋，真系慘過睇TVB劇！#房地產 #廣州 #廣州樓盤

廣州業主，想死嘅心都有！黃埔樓市大屠殺！單價由3.1萬直插水，穿咗1萬蚊關口，業主大出血都算啦，直情系連底褲都輸埋嗰只！當年買一套嘅錢，今日眼眨眨可以掃三套，你話癲唔癲？ 講返富力悅禧花園，當年2021年，個天真系藍到刺眼，夢甜到漏油，樓市癲到冇朋友。嗰陣時呢，一間高樓層東北向嘅單位，76平方米咋，望落去同個鴿子籠差唔多，但系喺當年，系搶手貨嚟架，爭到頭崩額裂，硬生生賣到238萬，拆開單價，3.14萬一個方。3.14萬喎！嗰陣時黃埔咩環境？宇宙中心啊大佬！新盤開售要靠搶，抽籤抽到你頭暈眼花，二手業主惡過賣魚勝，反價反到離曬譜，你今日睇完樓聽日佢就敢喺張約上加你二十萬，你仲要笑騎騎哀求佢賣俾你。所以當年嗰個價，唔使講話誇張，直情有人覺得自己執到寶，發夢都識笑，以為搭咗上城市發展嘅高速列車，財富自由在望，人生巔峰在望，日日飲住紅酒嘆世界，點知原來系飲緊毒酒。 醒嚇啦喂，家陣將個月曆掀到2026年，差唔多嘅戶型，都系高樓層，不過系北向囉，採光差啲就由佢啦，成交價幾多？講出嚟我怕你個心會驟停，79.8萬咋。79.8萬呀！單價1.05萬一個方。你聽真啲，1.05萬，呢個數目喺好多縣城都未必買到市中心地段呀？呢度系廣州喎，一線城市嘅黃埔喎，系當年俾一班地產佬吹到天上有地下無嘅價值窪地、投資聖地黃埔喎。前前後後夾埋都系五年光景，五年時間，一間屋嘅總價唔見咗158.2萬，單價仲勁過玩跳樓機，直插式落咗差唔多2萬蚊一個方。2萬蚊一平方米咩概念？分分鐘系打工仔一年唔飲唔食都儲唔到嘅血汗錢，話咁快就喺空氣入面蒸發，連個聲都冇，連影都唔見，好似倒咗盤水落沙漠，眨下眼就冇咗。 之前有個舊業主同我吐苦水，講到把聲震曬，話當年個買入價，今日擰轉頭一望，好傢夥，夠買差唔多三間有餘。我專登撳住個計數機計過，79.8萬乘返3，等如239.4萬，同當年個238萬比，就系多咗萬四蚊，呢啲邊系買樓?？直情系買咗個時光機，一嘢送你返去改革開放之前就真。當初你一間屋嘅錢，今日隔籬鄰舍可以買你左右兩間再搭多個車位，你話刺唔刺激？呢啲邊系資產縮水，直情系化學閹割呀，即時令你對財富增值呢樣嘢完全喪失曬所有幻想，成個人好似俾人抽走咗條脊骨，軟賴賴企唔起身。 呢個富力悅禧花園，別名又好聽喎，叫富力新城，個名夠曬照，聽落有番咁上下。查實剝開底褲睇真啲，佢系黃埔比較早期嘅舊改大盤，筆村翻新出嚟，根正苗紅嘅回遷格。2016年已經開賣，嗰時叫悅禧花園，均價都兩萬頭，當年計都唔算平架。按理呢，2016到2020年系黃埔樓價發癲嘅黃金歲月，科學城、知識城呢啲網紅區域，價錢翻倍好似食生菜，今日唔買聽日就高攀唔起。但系呢個樓盤邪到爆，偏偏好似未瞓醒，賣得死唔斷氣不特止，升幅仲慢過龜，大市升佢微跌，大市跌佢暴跌，成個反向指標咁，搵佢做參考分分鐘輸到底褲都冇。之後到咗2020年，唔知邊個醒目仔諗出嚟改名叫富力新城，是但‌改個名轉個運，辟嚇邪。不過老實講啦，個名改到識飛都冇用，改叫白金漢宮都系假，地段同產品本身嗰啲硬傷，好似塊面啲斑，厚粉都冚唔住，隔離阿婆都認得佢系嗰個死氣沉沉的舊改盤。 今日就同你撕開塊遮醜布，慢慢數臭呢個黑仔王，睇嚇佢點解可以令到班業主心都碎到一地都系，執都執唔返。 第一樣攞你命三千，交通。個盤定位就系上車盤，買呢度十個有八個都系打工仔，迫地鐵迫到懷疑人生嗰只。但個盤離地鐵站遠到呢，行到你想喊。我試過呢，用正常步伐行去最近嘅地鐵站，腳板底行到生水泡，冇廿分鐘都唔使旨意到，仲未計等燈位。夏天你行到成身汗，返到公司成陣除，啲同事行過都擰曬面。落雨更加系攞膽，條路水凼多到暈，一腳叉落去，鞋又濕褲又濕，黐湆湆全日，諗到都頭皮痕啊。平日出門幾乎靠自駕或駁腳小巴，但上上落落高峰期，條路塞到成條臘腸咁，你如果要出天河返工，朝早未天光就爬起身，夜晚星光伴你行返歸，攰到成只死狗，淨系搭車時間都夠你煲完五十集長劇，呢啲叫生活？呢啲直情系荒野求生。 第二樣，仲更加礙眼，廣本工廠舊巨型建築就喺二期左近，棟喺度成個沉默嘅污染源。呢單嘢業主之前都嘈過，拉過橫額，驚啲廢氣味吸到病。雖然啲官方檢測報告拍心口保證合格，但標準系死，人系生嘅。間廠同你隔條馬路，喺你眼皮底下噴煙，有時嗰陣酸宿味同機油味隨風飄過，好似冤魂咁捐入你窗，捐入你鼻，你個心會唔會怯？會唔會有條刺？自住嘅話，呢個問題你要攞命去賭，唞啖氣都要就住就住，成日疑神疑鬼，仲似樣生活咩？ 第三，成個片區直情系個巨型地盤，富力新城自己就系筆村舊改生出嚟嘅怪胎，周邊仲有大把大把爛地等拆等改，挖泥機打樁機嘈到拆天，灰塵密到睇唔到人。呢個代表咩？代表未來呢度嘅供應量好似山洪暴發，多到拎嚟砌牆都得。稀有性？唔存在嘅。你想賣樓，回頭一望，隔離新盤售樓處燈火通明，大聲公嗌劈價送家私，價錢平過你間二手，仲邊個咁傻仔睇你間老破大？況且隔籬仲有隻巨無霸萬科黃埔新城，570萬方嘅超級綜合城，大到可以獨立成國，仲有將軍山囤埋一堆貨，磨拳擦掌等出籠，競爭激到世界大戰咁款，你憑咩同人爭？爭價錢？人哋新樓分分鐘低過你；爭質素？人哋精裝交標抵過你毛坯。你手揸嗰間二手，直情系俾後浪推冧喺沙灘上嘅前浪，反抗都費事。況且舊改周期長到你想象唔到，周邊環境同交通要完全改善，張規劃圖畫得鬼咁靚，但成真？十年八載啦，等你個仔都識打關斗條路都未通到，你心急想住入去嘆世界就免問，慳返啲期望，費事失望到爆，最後精神失常。 第四，講區位，個樓盤笠喺老黃埔東面嘅南崗，離核心區魚珠差九條街，中間隔住個廟頭，好似隔住個宇宙。好多人吹話第二CBD紅利遲早會輻射到呢邊，帶旺個場。我聽到得啖笑，笑到牙都甩。老區府都仲喺度餓住肚等開飯，望到頸都長，輪到南崗呢個山旮旯？等到蚊瞓啦，阿媽都唔認得。情況就好似你住喺城鄉部，日日聽人講市中心要擴建，結果市中心自己都仲系度發吽哣，你沾到咩光？食西北風就有份。 講到底你可能覺得個樓盤冇忽好，周身釘，系垃圾池入面嘅戰鬥機。但咪住先，唔好咁快轉台，未使鬧我標題黨。衰嘢講曬，但系家陣望住個價錢，真系冇得彈喇。萬零蚊一平方米，喺黃埔？呢個系將發展商同業主啲骨都炸埋出油，直情系冧到地庫負十八層。買間現樓，即買即住，唔使驚爛尾，唔使好似買樓花咁日日去地盤門口踎，擔心走佬，細路仔返學問題叫搞得掂，門口就系學校，唔系名校但至少安全有保障。 對於嗰種荷包幹過沙漠，預算有限，又想喺廣州有個竇嘅上車客，性價比突然飆到爆曬燈。以前一間價而家買三間，你諗嚇，畀層樓首期嘅錢，今日可以Full Pay買一間，條數點計都冇蝕底，蝕底嗰啲系當年天價接貨嘅苦主，佢哋企喺山頂飲北風，我哋就喺地牢執平貨，心理上平衡到痹。雖然地牢下面可能仲有地庫，地庫下面可能仲有地獄，但系眼前一刻，你總算有個瓦遮頭，仲想點吖？ 所以你話呢個市場慘唔慘？真系慘到貼地，慘絕人寰，慘過睇悲情劇。當年嘅金菠蘿變成今日嘅燙手山芋，昔日嘅致富神話變成午夜凶鈴。每一個成交數字背後，都系一個家庭嘅眼淚史，有啲咬實牙關忍痛離場，有啲就攤平放棄，疊埋心水將層樓同份工一齊做到老，將個房貸當成永遠嘅噩夢。呢種涼，真系涼到入心入肺啊。