​​​​અમેરિકામાં હોટેલમાં કામ કરતા ગુજરાતીનું મોત

જ્યોર્જિયામાં આવેલી એક હોટેલમાં કામ કરતા સંજય પટેલ નામના ગુજરાતીનું અકસ્માતે મોત થઈ ગયું છે. મૃતકની ઉંમર 52 વર્ષ હતી અને તેઓ રમાડા ઈન નામની હોટેલમાં કામ કરતા હતા. આ હોટેલ જ્યોર્જિયાના મેકનમાં આવેલી છે. લોકલ મીડિયા રિપોર્ટ્સ અનુસાર સંજય પટેલ હોટેલ પર પહોંચેલી ટ્રકને અનલોડ કરી રહ્યા હતા ત્યારે ભારે સામાન તેમના પર પડતાં તેમનું ઘટનાસ્થળે જ મોત થઈ ગયું હતું. જૂન 30ના રોજ બનેલી આ ઘટના અંગે સ્થાનિક પોલીસ અધિકારી લોની મિલીએ જણાવ્યું હતું કે મૃતક ટ્રકમાં આવેલો સામાન ઉઠાવી રહ્યા હતા ત્યારે લોખંડનો દરવાજો તેમના પર પડ્યો હતો, તેનાથી તેમને એટલી ગંભીર ઈજા થઈ હતી કે તેમને હોસ્પિટલે લઈ જવાનો સમય પણ નહોતો મળી શક્યો.