ગુજરાતીના સ્ટોર પર ICEની રેડ, ઓનરની ધરપકડ કરાઈ

અમેરિકાના મેઈન સ્ટેટમાં સ્ટોર ચલાવતા ધવલ કાળીદાસ પટેલ નામના એક ગુજરાતી યુવકની ICE દ્વારા ધરપકડ કરવામાં આવી છે, લોકલ મીડિયા રિપોર્ટ્સ અનુસાર શનિવારના રોજ ધવલને અરેસ્ટ કરવામાં આવ્યા હતા, તેમનો વોલેસ માર્કેટ નામનો સ્ટોર ફ્રેન્ડશિપ નામના ટાઉનમાં હાર્બર રોડ પર આવેલો છે. ધવલ પટેલ અને તેમના પત્ની આ સ્ટોર ચલાવતા હતા, તેમના પત્નીએ મીડિયા સાથે વાત કરતા જણાવ્યું હતું કે ધવલ પટેલની સ્ટોરના કેશ રજિસ્ટર પરથી જ ધરપકડ કરવામાં આવી હતી. એજન્ટ્સ તેમને હાથકડી પહેરાવીને લઈ ગયા હતા અને તેમને કેમ અરેસ્ટ કરવામાં આવી રહ્યા છે તેનું કોઈ કારણ પણ નહોતું આપવામાં આવ્યું. ગ્રેટર બોસ્ટન લીગલ સર્વિસિસના એટર્ની ઓડ્રી રિચાર્ડ્સન દ્વારા આ મામલે ફેડરલ કોર્ટમાં હેબિયસ કોર્પસ મોશન ફાઈલ કરવામાં આવ્યો છે, મતલબ કે ICEએ ધવલ પટેલને રૂબરૂ કોર્ટમાં હાજર કરવાના રહેશે.