Мециновиќ: Во земјоделска држава, министерот за земјоделство нема оправдување за неуспех

На собраниската расправа за интерпелацијата на министерот за земјоделство Цветан Трипуновски, пратеникот на Левица, Амар Мециновиќ, порача дека македонското земјоделство продолжува да тоне и покрај сите природни предуслови што ги има државата за успешен развој на секторот. Според Мециновиќ, наместо конкретни резултати, земјоделците добиваат ветувања, доцнење на субвенциите и политики кои ги оттурнуваат од нивната основна дејност. Тој истакна дека во многу рурални средини земјоделството повеќе не обезбедува егзистенција, па сè повеќе луѓе се принудени да бараат работа во други професии или да ја напуштат државата. „Министер за земјоделство во Македонија да има лоши резултати, па тоа треба да се потрудите да имате лоши резултати“, истакна Мециновиќ од собраниската говорница. Пратеникот посочи дека власта се обидува да ја прикаже состојбата како успешна, додека реалноста на теренот е сосема поинаква. Според него, земјоделците се соочуваат со неисплатени или задоцнети субвенции, високи трошоци за производство и неизвесност околу својата иднина. Мециновиќ ја истакна и ароганцијата на власта и обидите критиките да се замолчат со закани со кривични и политички напади, наместо да се понудат решенија за реалните проблеми со кои се соочуваат земјоделците. Мециновиќ нагласи дека државата располага со плодна земја, поволна клима и долгогодишна земјоделска традиција, но дека резултатите се сè послаби бидејќи институциите работат во интерес на крупниот капитал, а не на малите и средни земјоделци. Земјоделството е еден од најважните ресурси на државата, а власта покажува дека не знае или не сака да го заштити. Левица смета дека на македонските земјоделци им се потребни навремени субвенции, сигурен пласман на производите, фер откупни цени и политики кои ќе го штитат домашното производство, а не интересите на неколкумина привилегирани.