2 Petulu 3:8- 18- MAWULU AMAHA NIIISEKI DADIHA

8Hakwila enu akwetu twakeŋa, bayi mulalamena ichi chuma chimuku, MWANTA wamonaŋa ifuku dimu didi neyi ikombakaji danyaka (1,000), niikombakaji danyaka didi neyi ifuku dimu. 9Mwanta halabaŋa kwila chuma chakaniniyi, neyi chatenaŋawu antu kulabaku, ilaŋa hakuduŋumika hadenu, hanakeŋi muntu niwumu kunoŋaku, nakeŋi antu ejima abalumuki munyichima. 10Ilaŋa Ifuku daMWANTA dakenza neyi chenzaŋa ikombi; denodu ifuku mawulu akahita nalushindu lwalweni, niyuma yejima yakasuŋunuka neyena dakesi, niiseki niyuma yidumu yakasukuma bwi-i. 11Ochu chineli yumiyi yejima yakasuŋunuka chochichi, shakamenu nakujila nakwakama Nzambi, 12nakutalila nikukeŋa nankashi chakenza Ifuku daNzambi dakasuŋunuka mawulu hakabutukawu kesi, dakasuŋunuka yuma yejima neyena dakesi. 13Hakwila etu twatalilaŋa mawulu amaha niiseki dadiha, mwakekala kuloŋa neyi chakaniniyi. 14Dichi enu akwetu twakeŋa, chimwatalilaŋa yumiyi, dikwatishenu kulonda akayiwani munashakami chachiwahi nzo-o, chakadi ihuji, nakubula hakuyinkela muloŋa kumesu indi. 15Toŋojokenu nenu chakubulayi Mwanta kuzuwa swayi hiwamwinu; mwomwayisonekeleliyi nimanakwetu Pawulu twakeŋa, namaana amwinkeluwu. 16Watenaŋa yumiyi munyikanda yindi yejima; mudi niyuma yikwawu yakala kwiluka, yenoyu antu akadi maana, azeya mukwitiya kwakukuhwelela ayiheŋeshaŋa, neyi chaheŋeshaŋawu Mukanda waNzambi wejima, hiyakudikisaŋana awenawu. 17Dichi enu akwetu twakeŋa, chimuneli mweluka dehi, babalenu mubuli kuhuŋumuka nakuluwaŋesha kwawantu atama, mubuli kufuma mukukola kwenwenu aweni. 18Kulenu muluwi nimukumwiluka Mwanta wetu Chamwinu Yesu Kristu. Lubanji lwakulema lwikali lwindi nikatataka nihayanyaka. Amena. Currently Selected: 2 Petulu 3: MWW04 Highlight Copy Compare Share The Holy Bible in Lunda Ndembu © United Bible Societies, 2003. Learn More About Mukanda Wajila Wanzambi