“Kurora e Lirisë”

Në Bern u organizua manifestimi përkujtimor dhe artistik “Kurora e Lirisë”, kushtuar sakrificës së Familjes Jashari dhe të gjithë dëshmorëve të kombit shqiptar. Në këtë ngjarje morën pjesë përfaqësues të institucioneve shtetërore, përfaqësues diplomatikë dhe bashkatdhetarë të shumtë. Të pranishëm ishin edhe ministrat e Qeverisë së Republikës së Kosovës, Xhelal Sveçla dhe Andin Ukshin Hoti, përfaqësuesi i familjes Jashari, Lulzim Adem Jashari, si dhe përfaqësues diplomatikë nga Republika e Shqipërisë, Republika e Kosovës dhe Republika e Maqedonisë së Veriut. Në kuadër të manifestimit, para fillimit të programit artistik, u prezantua ekspozita fotografike “Prekazi – dashuri, dhimbje dhe krenari kombëtare” e autorit Sefer Aliqkaj, e cila pasqyron përmes artit dimensionin historik dhe kujtesën kolektive të sakrificës kombëtare. Manifestimi u hap nga organizatorja e ngjarjes, Mirishahe Limani Hiler, ndërsa në nderim të dëshmorëve u mbajt një minutë heshtje. Programi vijoi me interpretimin e Himnit Kombëtar dhe me përmbajtje artistike me karakter përkujtimor. Gjatë manifestimit, folës të ndryshëm theksuan rëndësinë historike të sakrificës së Familjes Jashari dhe të luftës çlirimtare, duke e vlerësuar atë si themel të lirisë dhe shtetndërtimit të Republikës së Kosovës. Në përmbyllje, u theksua se manifestimi “Kurora e Lirisë” përfaqëson një akt të rëndësishëm të ruajtjes së kujtesës historike dhe të përcjelljes së saj tek brezat e rinj. Programi artistik u pasurua me pjesëmarrjen e ansambleve dhe shoqatave kulturore-artistike shqiptare që veprojnë në Zvicër, ndërsa në fund u paraqit Ansambli Kombëtar i Këngëve dhe Valleve “Shota” nga Kosova. Per fotografi dhe video u kujdes Kreativ MGstudio dhe Besainfo.ch