35-vjetori i Pajtimit të Gjaqeve shënohet në Zvicër

35-vjetori i Pajtimit të Gjaqeve shënohet në Zvicër – ngjarja dokumentohet nga Kreativmgstudio. Më 3 maj 2025, në qytetin Langenthal të Bernës, në Zvicër, u mbajt ceremonia përkujtimore e 35-vjetorit të Lëvizjes për Pajtimin e Gjaqeve, organizuar nga Lidhja Shqiptare në Botë Kryetari Nazmi Jakurti. Kjo lëvizje historike, që nisi më 1990, shënoi një nga aktet më të guximshme të mobilizimit kombëtar shqiptar, duke synuar ndërprerjen e gjakmarrjeve që kishin lënduar shoqërinë shqiptare ndër dekada. Ngjarja u moderua nga Dajana Berisha dhe u nderua nga figura të larta institucionale si Ambasadori i Republikës së Kosovës në Bernë, z. Mentor Latifi, Sekretari i Parë i Ambasadës së Shqipërisë, z. Valon Gashi, dhe Shefi i Konsullatës së Kosovës në Cyrih, z. Vigan Berisha. Në qendër të aktivitetit ishin xhirimet arkivore të fotografit Murteza Kurti, i cili kishte dokumentuar nga afër tubimet për pajtim në vitet ’90. Pamjet u përdorën si sfond për debatin e udhëhequr nga gazetarja Jeta Xharra, me pjesëmarrjen e iniciatorëve të lëvizjes si Hava Shala, Ibrahim Dreshaj, Shqipe Bytyqi dhe vetë Kurti. Studiuesi Dr. Zymer Neziri kontribuoi me një kumtesë për sfondin historik të kësaj iniciative. Panelistët sollën rrëfime autentike nga periudha e fillimit të lëvizjes, sfidat e punës në terren dhe rolin e figurave kyçe si profesori Anton Çetta. Po ashtu, u theksua rëndësia e arkivimit të kësaj historie kolektive dhe ruajtjes së saj për brezat e ardhshëm. Pianistja e njohur nga Gjeneva, Ermira Lefort, interpretoi disa pjesë muzikore dhe himnin shqiptar, duke theksuar se fenomeni i hakmarrjes vazhdon të mbajë të ngujuara qindra familje në Shqipërinë e Veriut. Tërë aktiviteti u dokumentua me fotografi dhe video nga Kreativmgstudio, e cila përcolli ngjarjen me profesionalizëm dhe kujdes të veçantë.