“Ne dhe Ata”

Një mbrëmje e veçantë humori ka sjellë atmosferë të ngrohtë dhe plot buzëqeshje për komunitetin shqiptar në Zvicër. Aktori i njohur Dan Morina prezantoi shfaqjen e tij më të re të stand-up komedisë, të titulluar “Ne dhe Ata”. Shfaqja, me skenar dhe regji nga Ben Apolloni, trajtoi me finesë dhe humor realitetin e përditshëm të shqiptarëve në diasporë, duke vënë në pah dallimet mes “ne” dhe “ata” në një mënyrë satirike, plot ironi dhe reflektim. Motoja e shfaqjes, “Komedi që dhemb… pak”, përcolli qartë mesazhin e një performance që jo vetëm argëton, por edhe nxit mendimin kritik. Në skenë, Dan Morina u shoqërua nga muzikantët Flutur Bytyqi dhe Bexhet Sallai në kitarë, duke i dhënë shfaqjes një dimension të veçantë artistik dhe emocional. Ngjarja u organizua nga Studio Aktrimi dhe Studio Artistike Feniks, me mbështetjen e Ambasadës së Republikës së Kosovës në Bern. Mbrëmja u hap nga zëvendësambasadorja Shukrie Ramadani, e cila përshëndeti të pranishmit dhe vlerësoi rëndësinë e aktiviteteve kulturore për komunitetin shqiptar në diasporë. Ambientet e Ambasadës së Republikës së Kosovës në Bern ishin te stërmbushura me pjesëmarrës, ndërsa atmosfera u karakterizua nga buzëqeshje, të qeshura dhe duartrokitje të vazhdueshme, duke e kthyer këtë mbrëmje në një përvojë të paharrueshme. Pas përfundimit të shfaqjes, mbrëmja vijoi në një ambient miqësor me një tavolinë të shtruar, ku të pranishmit patën mundësinë të njiheshin mes vete dhe të shkëmbenin biseda mbi vendlindjen dhe jetën në Zvicër. Nuk munguan as këngët live, të cilat e pasuruan edhe më tej atmosferën festive. Të gjitha këto momente u dokumentuan përmes videove dhe fotografive nga kreativMGstudio & Besainfo.ch duke sjellë për publikun një pasqyrë të plotë të kësaj mbrëmjeje të suksesshme artistike.