မြဝတီကျားဖြန့်လုပ်ငန်းများနှင့်ထိုင်းမှတရားမဝင်တရုတ်နိုင်ငံသား၃၀၇ဦးကိုတရုတ်နိုင်ငံသို့လွှဲပြောင်း

မြဝတီ ကျားဖြန့်လုပ်ငန်းများနှင့် ထိုင်းဘက်ခြမ်းမှ တရားမဝင် တရုတ်နိုင်ငံသား (၃၀၇) ဦးကို တရုတ်နိုင်ငံသို့ ပြန်လည်လွှဲပြောင်း မဲဆောက် ၊ ဇူလိုင် ၈ ၊ Horizons မြန်မာ-ထိုင်း နယ်စပ်၊ မြဝတီဒေသအတွင်းရှိ အွန်လိုင်းလောင်းကစားရုံများနှင့် ကျားဖြန့် (အွန်လိုင်းငွေလိမ်လည်မှု) လုပ်ငန်းများမှ တရုတ်နိုင်ငံသားများနှင့် ထိုင်းနိုင်ငံဘက်ခြမ်းတွင် တရားမဝင် နေထိုင်သူများ အပါအဝင် စုစုပေါင်း တရုတ်နိုင်ငံသား (၃၀၇) ဦးကို ယနေ့ ဇူလိုင်လ ၈ ရက်နေ့တွင် တရုတ်နိုင်ငံသို့ ပြန်လည်လွှဲပြောင်း ပို့ဆောင်ခဲ့ကြောင်း သိရသည်။ ယခုတစ်ခေါက် ပြန်လည်လွှဲပြောင်းပေးရာတွင် မြဝတီနယ်စပ်ဒေသအတွင်းရှိ တရားမဝင် လောင်းကစားရုံများနှင့် ကျားဖြန့်လုပ်ငန်းခွင်များမှ ဖမ်းဆီးရမိပြီး လက်ခံထိန်းသိမ်းထားသည့် တရုတ်နိုင်ငံသား (၂၃၉) ဦးနှင့် ထိုင်းနိုင်ငံဘက်ခြမ်းတွင် အထောက်အထားမဲ့ တရားမဝင် နေထိုင်လျက်ရှိသည့် တရုတ်နိုင်ငံသား (၆၈) ဦးတို့ ပါဝင်ခြင်းဖြစ်သည်။ အဆိုပါ တရုတ်နိုင်ငံသား စုစုပေါင်း (၃၀၇) ဦးကို ထိုင်းနိုင်ငံ၊ မဲဆောက်အပြည်ပြည်ဆိုင်ရာ လေဆိပ်မှတစ်ဆင့် China Southern Airlines လေကြောင်းလိုင်းကို အသုံးပြု၍ တရုတ်နိုင်ငံသို့ တိုက်ရိုက် ပြန်လည်လွှဲပြောင်း ပို့ဆောင်ပေးခဲ့ခြင်း ဖြစ်သည်။ လတ်တလောတွင် မြန်မာ-ထိုင်း နယ်စပ်တစ်လျှောက် အခြေစိုက် လုပ်ကိုင်နေကြသော တရားမဝင် အွန်လိုင်းလောင်းကစားနှင့် ဆိုက်ဘာငွေလိမ်လည်မှု (ကျားဖြန့်) ကွန်ရက်များကို သက်ဆိုင်ရာ နိုင်ငံများကြား ပူးပေါင်း၍ အရှိန်အဟုန်မြှင့် စောင့်ကြည့်ဖမ်းဆီးကာ နေရပ်ရင်းသို့ ဆက်တိုက် ပြန်လည်လွှဲပြောင်းလျက်ရှိကြောင်း သိရှိရသည်။ #မြဝတီ #ကျားဖြန့် #တရုတ်နိုင်ငံသားများ #မဲဆောက် #တရားမဝင်လောင်းကစား #HorizonsNews